„Ég verð að eiga byssu. Mér líður eins og fokking kellingu byssulaus,“ sagði Brynjar Barkarson, annar hluti dúettsins ClubDub sem er nú í uppnámi eftir að Brynjar hélt umdeilda ræðu á mótmælum þjóðernissinna á Austurvelli um síðustu helgi, en annar meðlimur hljómsveitarinnar tilkynnti óvænt að hann væri hættur í bandinu. 

Á myndbandi sem Brynjar birtir á Youtube fyrir um þremur mánuðum síðan sést hann fara í heimsókn til aðdáanda síns, ungs veiðimanns sem stundar nám í borginni. Hann leyfir Brynjari að handfjatla skotvopn sem hann geymir á heimilinu. Á myndbandinu lýsir Brynjar því að byssusafnið sé tilkomumikið og samanstandi af hefðbundnum veiðirifflum. Brynjar mundar skotvopnið, haglabyssu af gerðinni Benelli, sem er uppnefnd Binnelli í innskotinu og vísar í gælunafn Brynjars, Binni. Hann upplýsir jafnframt að hann sé búinn að senda póst svo hann geti fengið byssu, en upplýsir ekki hvort hann sé að sækjast þá eftir skotvopnaleyfi.