Alls bárust 316 tilkynningar um heimilisofbeldi til lögreglunnar á tímabilinu janúar til mars á þessu ári, samanborið við 274 á sama tíma í fyrra. Þetta er tæplega 15% aukning, en að meðaltali bárust 3,5 tilkynningar um heimilisofbeldi dag á tímabilinu.
Þetta kemur fram í nýrri skýrslu ríkislögreglustjóra um heimilisofbeldi og ágreining milli skyldra aðila sem tilkynnt var til lögreglu á fyrsta ársfjórðungi 2025.
Þar segir að markvissari skráning geti skýrt þessa fjölgun, en einnig er tekið fram að sé litið til síðustu tíu ára sé aukningin 10%.
Þegar litið er til bæði tilkynninga um heimilisofbeldi og um ágreining milli skyldra og tengdra aðila bárust 642 tilkynningar, eða rúmlega sjö á dag að meðaltali.
Málum þar sem árásaraðili og -þolandi tengjast nánum fjölskylduböndum, t.d. foreldrar, börn eða systkini, fjölgar ef borið er saman við síðasta ár. Aukin áhersla hefur verið hjá lögreglu á að skrá með markvissari hætti en áður sem gæti skýrt fjölgunina. Fleiri börn og ungmenni eru skráð í málunum, bæði sem árásaraðilar og -þolendur, segir í skýrslunni.
Hlutfall árásaraðila undir 18 ára tvöfaldaðist á milli ára, úr 15% í 30%. Börn og ungmenni undir 18 ára voru einnig 34% þeirra sem urðu fyrir ofbeldi af hendi fjölskyldumeðlims, en voru 18% á sama tímabili fyrir ári.
Alls voru 29 börn sem réðust að fjölskyldumeðlim, oftast að foreldri, í janúar til mars 2025 og um var að ræða minniháttar líkamsárás í stærstum hluta málanna. Í fjórðungi þessara mála höfðu fjölskyldumeðlimir tekist á og þá eru báðar tegundir skráð í málin, það er barn ráðist gegn foreldri og foreldri gegn barni.
Tilkynningum þar sem grunur er um alvarlegt eða endurtekið ofbeldi gegn lífi og heilsu fjölskyldumeðlims fjölgaði einnig á milli ára. Alls bárust 40 slík mál fyrstu þrjá mánuði ársins, samanborið við 21 á sama tímabili 2024.
Frá janúar til mars 2025 bárust 32 beiðnir um nálgunarbann og/eða brottvísun vegna heimilisofbeldis. Það er svipaður fjöldi og árið áður, þegar 34 beiðnir bárust.
Athugasemdir