Alsírski rithöfundurinn Boualem Sansal kom á Alþjóðlegu bókmenntahátíðina í Reykjavík fyrir tveimur árum. Hann er fæddur 15. október árið 1949 í Theniet El Had í Alsír. Sansal er rithöfundur, verkfræðingur og hagfræðingur og byrjaði að skrifa fimmtugur að aldri eftir að hann lét af störfum sem háttsettur embættismaður hjá alsírska ríkinu, innblásinn af pólitískri ólgu og gagnrýninn á uppgang íslamskrar bókstafstrúar í heimalandi sínu. Sansal skrifar á frönsku og verk hans hafa unnið til helstu bókmenntaverðlauna í Frakklandi, þar á meðal Prix du Premier Roman sem hann hlaut árið 1999 fyrir frumraun sína, Le serment des Barbares.

Fyrsta skáldsaga Boualem Sansal sem kom út á ensku, The German Mujahid (Europa, 2009), hlaut RTL lesendaverðlaunin í Frakklandi og var fyrsta skáldverk arabísks rithöfundar til að viðurkenna helförina á prenti. Bækur hans hafa verið kerfisbundið ritskoðaðar í Alsír vegna gagnrýni þeirra á stjórnvöld þar í landi. Árið 2012 hlaut Sansal hin virtu Prix du Roman Arabe bókmenntaverðlaun, og jafnframt þýsku friðarverðlaunin árið 2011. Sjöunda skáldsaga hans, 2084: The End of the World, hlaut Gran Prix frönsku akademíunnar fyrir skáldskap.

Sansal var fangelsaður í Alsír 16. nóvember 2024 vegna pólitískra skoðana sinna og hann hefur nú verið dæmdur í fimm ára fangelsi. Handtaka hans hefur aukið diplómatíska spennu milli Alsír og Frakklands en bækur hans hafa verið bannaðar í Alsír síðan árið 2006. 

Í dagskrá í tilefni af aldarártíð Thors Vilhjálmssonar (1925–2011) verður fjallað um verk Sansal. Á bókmenntahátíðinni verður hægt að skrifa nafn sitt á undirskriftalista þar sem krafist verður þess að Sansal verði látinn laus. Viðburðurinn fer fram sunnudaginn 27. apríl í Norræna húsinu klukkan 13 og er í samstarfi við Íslandsdeild PEN. Rithöfundurinn Sjón er formaður Íslandsdeilarinnar og mun sjá um viðburðinn ásamt þýðandanum Helgu Soffíu Einarsdóttur, sem ræddi einmitt við Sansal um verk hans þegar höfundurinn kom hingað á bókmenntahátíðina.