Stór­kost­lega sum­ar­nám­skeiðið er saga um upp­á­tækja­sama krakka í sum­ar­fríi sem þurfa að kljást við ofgnótt eða skort sum­ar­nám­skeiða.

Pabbi Péturs stein­gleymdi sér; skráði hann nefni­lega ekki á eitt ein­asta sum­ar­nám­skeið á meðan for­eldrar Stefaníu skráðu hana á þau öll, henni til mik­illar mæðu. Pétur og Stefanía eru perlu­vinir sem áður hafa komið fyrir í tveimur bókum tvíeyk­is­ins Tómasar Zoëga og Sólrúnar Ylfu Ingi­mars­dóttur. Sagan er ætluð yngstu sjálf­stæðu grunn­skólales­endum en hentar líka frá­bær­lega til sam­lest­urs for­eldra og barna á kvöldin.

Skráð á öll sumarnámskeiðin

Pétur býr með pabba sínum í rólegum takti og heim­sækir ömmu sína og Nornina sem býr í bíl­skúrnum þegar hann vantar meira fútt í dag­inn.

Alltaf þegar Stefanía kemur í heim­sókn er von á nýjum ævin­týrum sem hún keyrir jafnan áfram á meðan Pétur er ánægður með að fá að fylgja með og aðstoða vin­konu sína við hvaða hug­dettu sem hún fær, sjá um skóla­garð­inn fyrir hana á meðan hún er á sigl­inga­nám­skeiði (hún er skráð á öll sum­ar­nám­skeiðin, mun­iði!) eða halda sölu á hunda­sokkum sem eru í raun sokkar sem minnk­uðu í galdra­þvotta­vél ömmu og Norn­ar­innar.

Heimur fullorðinna slettist inn

Í anda sam­tíma­bók­mennta um ævin­týri krakka slett­ist heimur full­orð­inna inn í heim vin­anna, Pétur þarf að sjá um sig sjálfur þegar pabbi er í vinn­unni þar sem hann er ekki skráður á sum­ar­nám­skeiðin, og Stefanía fær Pétur með sér í háleyni­legt verk­efni að flytja út í smíða­kofa til að sleppa frá síæp­andi for­eldrum sínum. Allt er þetta þó gert án þess að um sé að ræða of mikla til­finn­inga­semi, Stefanía er jafn­fljót niður og upp í skap­inu og Pétur skilur lítið í full­orðna fólk­inu en reynir þó ekki að breyta því.

Í bók­inni eru fjöl­mörg hug­tök úr minni þús­ald­ar­kyn­slóðar-æsku eins og lykla­börn og jafn­vel smíða­verk­stæðis-nám­skeið og Skóla­garðar. Gagn­rýn­andi fékk á til­finn­ing­una að sögu­svið bók­ar­innar sé ekki endi­lega að reyna að setja sig inn í sam­tíma barna í dag með sína snjall­síma og sjón­varps­gláp heldur er frekar nostal­gísk sýn á sumur æsk­unnar sem líða hratt með sínum dag­legu ævin­týrum. Þessi sögu­heimur býr til sjar­mer­andi dýnamík sem frá­bærar mynd­skreyt­ing­arnar bæta svo nýrri vídd við.

Frábær samvinna hjá ungum höfundum

Mynd­skreyt­ingar Sólrúnar Ylfu eru hreint út sagt stór­kost­legar og gefa bók­inni mik­inn lit. Per­són­urnar Nornin, ung­ling­ur­inn Brynjólfur sem vinnur í skóla­görð­unum, eða skor­dýrin sem Pétur er að lesa um í skor­dýra­bók­inni sinni lifna við á síð­unni og gera að verkum að orð og mynd fara fram­úr­skar­andi vel saman í bók­inni. Augljóst að um frá­bæra sam­vinnu er að ræða hjá þessum ungu en meira en upp­renn­andi höf­undum. Því ber að fagna að fá nýjar og auð­lesnar sögur fyrir yngstu les­endur, en sagan gefur þó engan afslátt í orða­forða eða hug­mynda­auðgi. Það er ósk­andi að höf­undar haldi áfram sínu sam­starfi og færi okkur enn fleiri barna­bækur sem ýta undir lif­andi lestur.

Í hnot­skurn: Stór­kost­lega sum­ar­nám­skeiðið er frá­bær lestur fyrir fyrstu bekki grunn­skóla, með lif­andi per­sónum og frá­bærum mynd­skreyt­ingum.