Finnur Ricart Andrason, sérfræðingur í umhverfis- og loftslagsmálum, skipar fyrsta sætið á lista Vinstri hreyfingarinnar - græns framboðs í Reykjavíkurkjördæmi norður. Rósa Björk Brynjólfsdóttir, fyrrverandi alþingismaður, skipar annað sæti listans og Brynhildur Björnsdóttir, varaþingmaður hreyfingarinnar er í því þriðja. 

Í Reykjavíkurkjördæmi suður skipar Svandís Svavarsdóttir, formaður hreyfingarinnar, fyrsta sætið.  Orri Páll Jóhannsson þingflokksformaður er í öðru sæti listans og Jósúa Gabríel Davíðsson, formaður Ungra vinstri grænna, er í því þriðja.

Framboðslistar VG í Reykjavíkurkjördæmunum voru kynntir og samþykktir á fundi hreyfingarinnar sem haldinn var á Nauthóli í dag.

Finnur Ricart er forseti Ungra umhverfissinna og hefur ekki setið á þingi fyrir flokkinn. Rósa Björk sagði sig úr hreyfingunni árið 2020 vegna óánægju með ríkisstjórnarsamstarfið við Sjálfstæðisflokk og Framsókn. Hún starfaði um tíma utan þingflokka en bauð sig síðan fram fyrir Samfylkinguna og varð varaþingmaður. Á síðasta ári var hún ráðin verkefnastjóri alþjóðamála í forsætisráðuneytinu þar sem Katrín Jakobsdóttir, þáverandi formaður VG, starfaði sem ráðherra. 

Katrín skipar heiðurssæti á lista VG í Reykjavík norður. Hún sagði af sér embætti forsætisráðherra fyrr á þessu ári þegar hún ákvað að gefa kost á sér til embættis forseta Íslands.