„Vegna tímabundinna heilsufarsástæðna og að læknisráði hef ég tekið þá ákvörðun að sækjast ekki eftir oddvitasætinu á lista Samfylkingarinnar í Suðvesturkjördæmi né heldur taka sæti meðal efstu manna,“ segir Guðmundur Árni Stefánsson, varaformaður Samfylkingarinnar og bæjarfulltrúi í Hafnarfirði. Hann hafði áður gefið út að hann ætlaði að sækjast eftir oddvitasætinu.

„Af ofangreindum ástæðum er fyrirliggjandi, að ég hefði ekki átt þess kost að taka þátt í komandi kosningabaráttu og þeim viðamiklu verkefnum sem framundan eru, af þeim krafti sem ég er vanur og vilji minn stóð til. Þess vegna stíg ég til hliðar að þessu sinni,“ segir hann.

Þetta skrifar Guðmundur Árni á Facebooksíðu sína nú undir hádegið. Þar segist hann fagna innkomu Ölmu Möller og styður hana til forystusætis. Einnig vekur hann athygli á Guðmundi Ara Sigurjónssyni og Hildi Rósar Guðbjargardóttur sem ungu forystufólki í kjördæminu. 

„Jafnaðarmenn eru í  góðum sóknarfærum undir ötulli forystu Kristrúnar Frostadóttur og ég mun styðja baráttu flokksfélaga minna eftir því sem mér er unnt. Einnig mun ég sinna áfram skyldum mínum sem bæjarfulltrúi í Hafnarfirði og varaformaður flokksins eins og kostur er.

Ég bið fjölmiðla og aðra að virða þessa persónulegu aðstæður mínar og bið fyrir góðar kveðjur,“ skrifar Guðmundur Árni að lokum.

Heimildin greindi frá því í gær að Flosi Eiríksson, fyrrverandi bæjarfulltrúi og oddviti Samfylkingarinnar í Kópavogi, hyggist að sækjast eftir oddvitasætinu í Suðvesturkjördæmi. 

Þórunn Sveinbjarnardóttir, þingmaður Samfylkingarinnar

Mynd: Heimildin / Davíð Þór

Þórunn Sveinbjarnardóttir, þingmaður Samfylkingarinnar, hefur þegar gefið út að hún sækist eftir þessu sama sæti. Þórunn leiddi lista Samfylkingarinnar í kjördæminu í síðustu kosningum og var sú eina af lista flokksins í kjördæminu sem náði inn á þing.  

Ef miðað er við fylgismælingar að undanförnu er útlit fyrir að hagur flokksins muni vænkast og hann bæti við sig þingmönnum í næstu kosningum.