Finnst að Einar ætti jafnvel að segja af sér

„Ég er að mót­mæla ummælum borg­ar­stjóra um starf sem ég er búin að sinna í 30 ár. Þar sem er sagt að ég geri allt til að forð­ast það að vinna með börn­unum og að ég sé með alltof mik­inn veik­inda­rétt og und­ir­bún­ings­tíma sem fer meira og minna í fund­ar­höld,“ segir Edda Kristín Hauks­dóttir, kenn­ari í Haga­skóla, við Heim­ild­ina.

Blaða­maður náði tali af Eddu á mót­mælum Kenn­ara­fé­lags Reykja­víkur við Ráðhúsið í dag. Þar var fjöldi kenn­ara saman kom­inn til að mót­mæla orðum Einars Þor­steins­sonar borg­ar­stjóra, sem hann lét falla á fjár­mála­ráð­stefnu Sambands íslenskra sveit­ar­fé­laga fyrr í vik­unni.

Einar sagði á ráð­stefn­unni að öll töl­fræði benti til þess að væri verið að gera eitt­hvað „algjör­lega vit­laust“ í skól­unum. Kenn­ar­arnir væru að biðja um það að fá að vera minna með börn­unum, „en eru samt veik­ari en nokkru sinni fyrr og kenna minna og fleiri ein­hverj­ir und­ir­bún­ings­tím­ar.“

Mynd: Golli

Edda Kristín segir að orð Einars séu til marks um algjört skiln­ings­leysi hans á starfi kenn­ara. „Ég held að hann ætti bara að koma og kenna aðeins. Hann hefði bara gott af því. Ég hugsa að hann þyrfti ekki marga daga til að skilja þetta betur.“

Aðspurð segir hún að hún vilji að Einar biðj­ist afsök­unar. „Og jafn­vel bara segi af sér. Þegar hann hefur þetta við­horf hefur hann ekk­ert að gera í þetta starf.“

Vilja ekki vera minna með nemendum

Einar brást við gagn­rýn­inni í garð ummæla sinna með aðsendri grein á Vísi í gær­kvöldi. 

Atli Krist­ins­son, annar kenn­ari við Haga­skóla, segir að Einar geti ekki tekið ábyrgð á móðg­un­inni sem hafi verið sýnd kenn­urum með þessum orðum. „Hann beindi þessu til okkar eins og við værum að mis­skilja. Það var ekki mjög herra­mann­legt af honum,“ segir Atli. Hann segir að hann vilji að Einar biðj­ist almenni­lega afsök­unar og hlusti á kenn­ara. „Læri af sínum mis­tökum.“

Mynd: Golli

Mikael Marinó Rivera, kenn­ari í Rima­skóla, segir ummælin „ömur­leg og óaf­sak­an­leg.“ Hann segir það ekki hægt að túlka þau á annan hátt en þau birt­ust. 

Aðspurður seg­ist Mikael vilja að Einar við­ur­kenni mis­tök sín. Þá mætti hann kynna sér málin betur. „Ég hef unnið sem kenn­ari í 15 ár og það hefur aldrei snú­ist um það að vera minna og minna með nem­endum. Ég veit ekki alveg hvaðan hann grípur þetta.“

Einn kollegi þinn vildi afsögn – ert þú þar líka?

Ég er nú ekki alveg kom­inn þangað, batn­andi mönnum er best að lifa. Þetta er aðal­lega bara að hann taki þetta til sín og kynni sér málin. Svo verður hann bara að gera upp við sig hvað hann vilji gera,“ segir Mikael.

Mót­mæl­end­urnir fóru inn í Ráðhúsið og ræddu þar við Dag B. Egg­erts­son, for­seta borg­ar­stjórnar, en Einar er staddur á ráð­stefnu í útlöndum og var því ekki við. Dagur bað kenn­ar­ana afsök­unar fyrir hönd borg­ar­stjórnar. „Ég veit að þið eigið erindi við núver­andi borg­ar­stjóra. Hann er því miður ekki á borg­ar­stjórn­ar­fund­inum heldur er ég er hér í afleys­ingum. Ég veit að hann hefði viljað vera hérna til þess að tala við ykkur,“ sagði Dagur.

Stað­geng­illDagur B. Egg­erts­son ræddi við mót­mæl­endur.

Mynd: Golli