Einar Þorsteinsson, oddviti Framsóknarflokksins, tók við embætti borgarstjóra í dag. Einar var kjörinn nýr borgarstjóri Reykjavíkur á fundi borgarstjórnar klukkan þrjú. Var hann kosinn með 14 atkvæðum en auðir kosningaseðlar voru 9. Að fundi loknum munu nýr borgarstjóri og fráfarandi borgarstjóri, Dagur B. Eggertsson, skiptast á lyklum með formlegri athöfn sem fer fram á skrifstofu borgarstjóra. 

Í ræðu sinni þakkaði Einar fráfarandi borgarstjóra fyrir störf sín en minnti þó á þetta væri ekki kveðjustund og Dagur væri ekki farinn. Hann muni ennþá gegna mikilvægu hlutverki í borgarstjórn, sem formaður borgarráðs. 

Kveðið var á um sætaskipti Einars og Dags í meirihlutasáttmála Framsóknarflokks, Samfylkingar, Pírata og Viðreisnar sem undirritaður var sumarið 2022. Á fyrstu 18 mánuðum kjörtímabilsins hefur Einar verið formaður borgarráðs en nú mun Dagur gegna því embætti út kjörtímabilið.

Langur ferill í borgarstjórn

Dagur B. Eggertsson hefur verið borgarstjóri samfellt frá árinu 2014. Áður, eða haustið 2007, gegndi Dagur embætti borgarstjóra í hundrað daga. Hann hefur setið í borgarstjórn fyrir Samfylkinguna frá árinu 2002. Enginn hefur setið lengur í borgarstjórn en hann.   

Í nýlegu viðtali við Heimildina sagðist Dagur ekki sjá fyrir sér að fara aftur í borgarstjórnarkosningar. Hann sagðist þó ekki útiloka að fara í landsmálin og taka þátt í næstu alþingiskosningum.

Samfylkingin hefur verið að mælast vel í könnunum og mælist nú með mest fylgi allra flokka á landsvísu. Í desemberkönnun Maskínu mældist flokkurinn með 26 prósenta fylgi, sem er um níu prósentum meira en Sjálfstæðisflokkurinn sem er með næstmest fylgi.

Í ræðu á borgarstjórnarfundi í dag hrósaði Dóra Björt Guðjónsdóttir, borgarfulltrúi Pírata, Degi fyrir festu í stjórnmálum og þakkaði honum fyrir vel unnin störf. Þá bætti Dóra við „að sagan muni fara mjúkum höndum um Dag.“

Einar Þorsteinsson borgarstjóri

Einar er fyrsti Framsóknarmaðurinn til að gegna embætti borgarstjóra Reykjavíkur. Þrátt fyrir stuttan feril í stjórnmálum tókst Einari að tryggja sér borgarstjórastólinn í krafti sögulega góðs gengis Framsóknarflokksins í borgarstjórnarkosningunum árið 2022.

Í kosningunum fékk Framsóknarflokkurinn 18,7 prósent greiddra atkvæða. Jókst fylgi þeirra um rúm 15 prósent frá síðustu kosningum árið 2018, þar sem Framsóknarflokkurinn fékk um 3,2 prósent atkvæða.

Einar starfaði áður sem fréttamaður hjá Ríkisútvarpinu um árabil. Áður en hann hóf feril sinn í stjórnmálum var hann flestum kunnur sem þáttastjórnandi í Kastljósi. Hann sagði upp störfum þar í ársbyrjun 2022 og í mars tilkynnti hann um framboð sitt í þættinum Vikunni með Gísla Marteini.

Áður en Einar gekk til liðs við Framsóknarflokkinn var hann meðlimur í Sjálfstæðisflokknum og var til að mynda eitt sinn formaður Félags ungra sjálfstæðismanna í Kópavogi. 

Einar er fæddur á aðfangadag 1978 og er með BA-gráðu í stjórnmálafræði frá Háskóla Íslands. Hann er kvæntur Millu Ósk Magnúsdóttur, sem starfar sem aðstoðarmaður heilbrigðisráðherra, Willums Þórs Þórssonar.

Sjá má fund borgarstjórnar í beinu streymi hér: