Heimildin hefur undanfarið bætt við sig nýju starfsfólki sem er ætlað að stórauka þá þjónustu sem miðillinn veitir lesendum sínum. Í byrjun desembermánaðar var sett á fót sérstök veffréttadeild sem hefur það hlutverk að auka daglega fréttaþjónustu Heimildarinnar á vef. Fjórir blaðamenn hafa þegar hafið störf á þeirri deild, þau Ragnhildur Helgadóttir, Georg Gylfason, Katrín Ásta Sigurjónsdóttir og Jón Ferdínand Estherarson.
Ragnhildur starfaði áður hjá mbl.is og er með BA-gráðu í bókmenntafræði frá Háskóla Íslands. Georg var áður blaðamaður á Fréttablaðinu. Hann er sagnfræðimenntaður frá Háskóla Íslands og með meistaragráðu í hagfræði og stjórnmálafræði frá London School of Economics. Katrín Ásta er menntuð í fjölmiðlafræði frá Háskólanum á Akureyri og starfaði á Fréttablaðinu fram að lokun þess. Jón Ferdínand er meistari í sagnfræði og með BA-gráðu í stjórnmálafræði, meðal annars með séráherslu á stjórnmálasálfræði popúlísma og áhrif fjármagns á kosningar í rómverska lýðveldinu.
Þá hóf ljósmyndarinn Kjartan Þorbjörnsson, Golli, nýverið störf hjá Heimildinni. Hann sinnir myndritstjórn jafnt á vef og í blaði, samhliða því að sjá um ljósmyndir fyrir miðilinn. Golli er með reyndustu starfandi fréttaljósmyndurum landsins og hefur hlotið fjölmörg verðlaun fyrir störf sín. Hann starfaði áður hjá Iceland Review.
Nýr vikulegur sjónvarpsþáttur Heimildarinnar fór auk þess í loftið 1. desember síðastliðinn og hefur verið afar vel tekið. Hann heitir Pressa og er í umsjón Aðalsteins Kjartanssonar, Helga Seljan og Margrétar Marteinsdóttur, blaðamanna á Heimildinni.
Þátturinn er sendur út í beinu streymi í gegnum vef Heimildarinnar í hádeginu á föstudögum og verður aðgengilegur áskrifendum. Um er að ræða þjóðmálaþátt þar sem fjallað verður um málefni líðandi stundar, en þátturinn er sendur út sama dag vikunnar og prentúgáfa Heimildarinnar berst áskrifendum í hverri viku.
Fleiri nýjungar verða kynntar áskrifendum á næstu vikum og mánuðum.
Lestur að Heimildinni jókst mikið við aukna útgáfutíðni síðasta vor. Í Reykjavík mældist Heimildin mest lesna blað borgarinnar ásamt Morgunblaðinu og var munurinn innan skekkjumarka. Á landsvísu lesa nú að meðaltali 14,2 prósent Heimildina í hverri viku, samkvæmt könnunum Gallup.
Hægt er að gerast áskrifandi á vefslóðinni heimildin.is/askrift.
Athugasemdir (2)