Borg­ar­ráð sam­þykkti á fundi sínum í dag að stytta af Séra Friðriki Frið­riks­syni sem stað­sett er á horni Lækj­ar­götu og Amt­manns­stígs verði tekin niður. Verkið verður fært í lista­verka­geymslu á vegum Lista­safns Reykja­víkur. 

Í bók­inni Séra Friðrik og drengirnir hans eftir Guðmund Magn­ús­son sagn­fræð­ing og blaða­mann koma fram ásak­anir á hendur Friðriki um kyn­ferð­is­legt áreiti og ofbeldi sem hann er sagður hafa beitt drengi. Þá hafa fleiri frá­sagnir af brotum Friðriks litið dags­ins ljós í kjöl­farið, meðal ann­ars í Heim­ild­inni.

Sigurjón Ólafsson, einn af fremstu mynd­höggv­urum þjóð­ar­innar, skap­aði minn­is­merkið og var það reist árið 1955 í næsta nágrenni við þáver­andi höf­uð­stöðvar KFUM og KFUK, að til­stuðlan gam­alla nem­enda séra Friðriks. 

„Í ljósi ásak­ana sem fram hafa komið um að séra Friðrik hafi beitt drengi kyn­ferð­is­legu áreiti eða ofbeldi, sam­þykkti borg­ar­ráð þann 9. nóv­em­ber síð­ast­lið­inn, að leita umsagna KFUM og KFUK ann­ars vegar og Lista­safns Reykja­víkur hins vegar, um hvort taka ætti minn­is­merkið af stalli,“  segir í til­kynn­ingu frá Reykja­vík­ur­borg. 

Umsagn­irnar liggja nú fyrir og hníga í sömu átt, það er að minn­is­merkið verði tekið niður. Umhverfis- og skipu­lags­sviði borg­ar­innar verður falið að koma með til­lögur að frá­gangi svæð­is­ins í sam­starfi við Lista­safn Reykja­víkur.

Áminning um það sem miður fer í samfélaginu

For­svars­fólk Lista­safns Reykja­víkur sagði í umsögn sinni að minn­is­merkið um séra Friðrik sé ein áhuga­verð­asta stand­mynd Sig­ur­jóns. Í áranna rás hafi margir farið lof­sam­legum orðum um lista­verkið en að í ljósi nýrra upp­lýs­inga og umræðu hafi merk­ing verks­ins breyst. „Upplifun ein­stak­linga af lista­verkum er mótuð af þeim tíma sem menn lifa og reynslu­heimi hvers og eins,“ segir í umsögn­inni.

„Þannig getur lista­verk sem eitt sinn var minn­is­varði og upp­hafn­ing orðið að áminn­ingu um það sem miður fer í sam­fé­lag­inu. Fátt bendir til þess að þeir sem líta minn­ingu séra Friðriks jákvæðum augum kjósi að verkið verði að slíku minn­is­merki auk þess sem fá sam­fé­lög reisa sér minn­is­varða um eigin skömm.“ 

Í umsögn KFUM og KFUK segir meðal ann­ars að allt hafi sinn tíma. „Þegar styttur senda önnur skila­boð út í sam­fé­lagið en þeim var upp­haf­lega ætlað þá er eðli­legt að borg­ar­yf­ir­völd skoði að gera breyt­ingar,“ segir í umsögn­inni. „Hlutverk okkar er að vald­efla börn og ung­menni og gefa þeim gott vega­nesti út í lífið. Á þeirri mik­il­vægu veg­ferð hefur stytta af stofn­anda félags­ins lítið vægi.“