Þessi grein birtist fyrir meira en ári.

Akranes íhugar að fjarlægja séra Friðrik af lista yfir heiðursborgara

Bæjaryfirvöld á Akranesi eru að skoða að fjarlægja séra Friðrik Friðriksson af lista yfir heiðursborgara í bænum. Ástæðan eru fréttir um að hann hafi áreitt drengi. Málið verður tekið fyrir á næsta bæjarstjórnarfundi.

24. nóvember 2023 · 15:16

Ingi Freyr Vilhjálmsson

ritstjorn@heimildin.is

Bæjaryfirvöld á Akranesi íhuga nú að fjarlægja séra Friðrik Friðriksson, stofnanda KFUM og KFUK, af lista yfir heiðursborgara í bænum. Þetta segja þeir Haraldur Benediktsson bæjarstjóri og Valgarður Jónsson, forseti bæjarstjórnar, í samtölum við Heimildina.

Séra Friðrik var gerður að heiðursborgara árið 1947. Átta einstaklingar hafa verið gerðir að heiðursborgurum á Akranesi.

Ástæðan eru fréttir um að séra Friðrik hafi verið haldinn barnagirnd og áreitt drengi. Rót þeirrar umfjöllunar er bók um ævi séra Friðriks eftir Guðmund Magnússon sagnfræðing. Stóra afhjúpunin í þeirri bók er þessi háttsemi séra Friðriks gagnvart drengjum. Eftir útkomu bókarinnar hafa tvö dæmi um áreitni séra Friðriks gagnvart drengjum á Akranesi komið fram.

Borgaryfirvöld í Reykjavík greindu frá því í gær að stytta af séra Friðriki og dreng í miðbænum yrði fjarlægð í ljós þeirrar umræðu sem bókin hefur leitt af sér.

„Ég býst við að það verði tekin ákvörðun um þetta á næsta bæjarstjórnarfundi, sem verður á þriðjudaginn.“

Ákvörðun tekin á næsta bæjarstjórnarfundi

Haraldur Benediktsson segir: „Við fengum ábendingu um þetta, að hann væri heiðursborgari, og ég veit að pólitíkin er í debatt um þetta.“ Haraldur, sem áður var þingmaður Sjálfstæðisflokksins, er nú bæjarstjóri á Akranesi eftir að hafa verið ráðinn í starfið og er því ekki kjörinn fulltrúi og þar með stjórnmálamaður lengur.

Valgarður Jónsson úr Samfylkingunni segir um málið: „Við erum ekki búin að klára samtalið á meðal kjörinna fulltrúa. En þeirri spurningu hefur verið varpað upp hvort það sé ekki rétt að fjarlægja þetta nafn af listanum yfir heiðursborgara Akraness vegna þeirra upplýsinga sem hafa komið fram.“

Hann segir að ástæðan fyrir umræðunni sé að þolendur séra Friðriks eigi að njóta vafans í málinu. „Ég býst við að það verði tekin ákvörðun um þetta á næsta bæjarstjórnarfundi, sem verður á þriðjudaginn.“

Kjósa

Hvernig finnst þér þessi grein? Skráðu þig inn til að kjósa.

Deila

Efnisorð

Sr. Friðrik og drengirnir

Athugasemdir (2)

Skráðu þig inn til að skrifa athugasemd eða kjósa.

BDÞ

Birgir Dalai Þórðarson skrifaði
26. nóvember 2023 12:07

Aldeilis illa grundað og ekki íhugað af bæjarstjórn Akraness! Ég bjó ungur drengur á Skaga og man eftir KFUM samkomum þar og hvað Sr. Friðrik var þægilegur og skemmtilegur gamall kall með skegg. Hann klappaði mann á kollinn og sagði m.a. "mikið er alltaf gaman að sjá þig svona fallegur drengurinn". Í heimsókn í Vaglaskóg tók hann mig upp og man ég vindla ilminn. Sr. Friðrik var kraftaverka maður sbr KFUM og KFUK Valur Vatnaskógur o.m.fl. jákvætt sem hann stóð fyrir. Mikil skömm allar þessar fordæmingar, sem nær ekkert eru rökstuddar og hver étur eftir öðrum. Mikil er skömm þeirra Egils sjónvarps manns og Guðmundar sagnfræðings að nota Illar sögur til að selja bækur. Hvorugur þeirra hafa hitt Sr. Friðrik né vita mikið um hann störf og athafnir.

0
Ásgeir Överby skrifaði
25. nóvember 2023 09:30

Það eiga allir íbúar að vera heiðursborgarar. Minnsta tannhjólið í úrverki gerir jafnmikið gagn og driffjöðurin.

1

Allar athugasemdir eru ábyrgð á þeirra sem þær skrifa. Heimildin áskilur sér rétt til að fjarlægja ærumeiðandi og óviðeigandi athugasemdir. Hægt er að láta vita af athugasemdum með því að smella á Tilkynna.

Tengdar greinar