„Í tillögunni er tekið skýrt fram að þótt Ísrael hafi rétt til að verja sig er sá réttur ekki takmarkalaus,“ sagði Sigmar Guðmundsson, þingmaður Viðreisnar, þegar hann vakti athygli á þingsályktunartillögu Viðreisnar um að fordæma hryðjuverkaárásir Hamas í Ísrael og árásir Ísraelshers gegn almennum borgurum í Palestínu, í störfum þingsins í upphafi þingfundar.
Þingsályktunartillagan er samhljóða breytingartillögu Kanada sem lögð var fyrir á allsherjarþingi Sameinuðu þjóðarinnar 27. október við afgreiðslu ályktunar þess efnis að koma á mannúðarvopnahléi á Gaza tafarlaust. Tillagan var lögð fram af Jórdönum. Í breytingartillögu Kanada var lagt til að árás Hamas-samtakanna á ísraelska borgara yrði fordæmd samtímis. Á hana féllst meirihluti aðildarríkja Sameinuðu þjóðanna ekki. Utanríkisráðuneytið segist hafa stutt tillögu Kanada og þar sem ekki hafi náðst samstaða um hana hafi Ísland setið hjá.
„Það hefur auðvitað verið mjög dapurlegt að fylgjast með því hvernig utanríkisráðuneytið og forsætisráðuneytið og hæstvirtir ráðherrar þar hafa verið að skiptast á fréttatilkynningum þar sem menn eru að leiðrétta hver annan um það hver hin raunverulega afstaða Íslands ætti að vera,“ sagði Sigmar, sem vonast til þess að tillaga Viðreisnar verði til þess að „allir þingmenn Íslendinga sameinist í því sem er rétt að gera og sem allar vinaþjóðir okkar stóðu saman að á vettvangi Sameinuðu þjóðanna.“
„Það er okkar von að þessi samstaða náist því að það skiptir mjög miklu máli í svona viðkvæmu og erfiðu og langvinnu átakamáli fyrir botni Miðjarðarhafs að þjóð eins og okkar tali einum rómi,“ sagði Sigmar jafnframt.
Þetta er ekki fyrsta þingsályktunartillagan um vopnahlé á Gaza. Í gær var þingsályktunartillögu Pírata útbýtt á Alþingi þess efnis að fordæma aðgerðir Ísraelshers í Palestínu og kalla eftir tafarlausu vopnahléi af mannúðarástæðum. Heimildin greindi frá því fyrir helgi að Jódís Skúladóttir og Steinunn Þóra Árnadóttir, þingkonur Vinstri grænna væru meðal þeirra tíu þingmanna sem standa að tillögunni.
„Ef samkenndin væri drifkraftur stjórnmálanna þá væru engin stríð“
Gísli Rafn Ólafsson, þingmaður Pírata, ræddi átökin fyrir botni Miðjarðarhafs einnig í upphafi þingfundar. Hann sagði okkur manneskjunum vera eðlislægt að finna til þegar brotið er á öðrum manneskjum.
„Læknum, hjúkrunarfólki og öðrum sem horfa upp á erfiða hluti er oft sagt að þau megi ekki tengjast skjólstæðingum of persónulegum böndum því að þá gæti orðið flókið að starfa með þeim í þeim erfiðu aðstæðum sem fram undan geta verið. Á sama hátt er okkur stjórnmálamönnum sagt að hugsa ekki um einstaka mál heldur hag heildarinnar,“ sagði Gísli, sem telur þetta hins vegar vera kolranga nálgun.
„Það er akkúrat með því að tengjast einstaklingum og virkja þar með samkenndina sem við fáum drifkraftinn og skilninginn á því hvað þarf að gera, hvað þarf að bæta og hvað þarf að setja fókusinn á. Ef samkenndin væri drifkraftur stjórnmálanna þá væru engin stríð, þá væri engin fátækt því að þá værum við löngu búin að nota þær sterku tilfinningar sem samkenndin vekur innanbrjósts hjá okkur til þess að bæta þann heim sem við lifum í.“
Hvað sem tveimur þingsályktunartillögum líður er staðan enn sú að Ísland hefur fordæmt árásir Hamas á Ísrael en ekki árásir Ísraelshers á Gaza. Ríkisstjórn kom saman til fundar venju samkvæmt í morgun en þar var utanríkisstefna Íslands hvað varðar átökin fyrir botni Miðjarðarhafs ekki á dagskrá.
Athugasemdir