„Að mati okkar lítur út fyrir að þeir séu að gera land­fyll­ing­una fyrir námu­fjár­fest­anna í bænum,“ segir Steinarr Lár, for­maður Brim­bretta­fé­lags Íslands, í við­tali við enska blaðið The Guardian í frétt sem birt­ist á vef­síðu mið­ils­ins í gær. Í frétt­inni er fjallað um deilur Brim­bretta­fé­lags Íslands við Sveit­ar­fé­lagið Ölfus út af umdeildri land­fyll­ingu sem verið er að gera i Þor­láks­höfn.

Brim­bretta­fé­lagið telur að land­fyll­ingin muni eyði­leggja öld­una við strönd­ina og að hún sé ein­stök á lands­vísu. Áhuga­vert er að erlent stór­blað eins og The Guardian fjalli um slíkt deilu­mál í íslenskum bæ. Steinarr Lár segir hins vegar að þetta sé ekk­ert svo skrítið þar sem málið snýst um skemmdir á nátt­úru­legum gæðum á heims­vísu: Öldunni í Þor­láks­höfn: „Það eru ekk­ert svo margar svona öldur til í heim­inum. Þetta eru verð­mætin sem fólk á Íslandi áttar sig ekki almenni­lega á. Þess vegna er ekk­ert skrítið að The Guardian fjalli um þetta. Aldan er nátt­úruperla sem ekki bara Íslend­ingar nota.“

Land­fyll­ingin liggur að hafn­ar­svæði þar sem fyr­ir­tæki námu­fjár­fest­anna Einars Sig­urðs­sonar og Hrólfs Ölv­is­sonar flytur út jarð­efni. Þessir sömu fjár­festar eiga fast­eignir á jörð­inni Hjallla í Ölfusi sem Elliði Vign­is­son bæj­ar­stjóri býr í og seg­ist vera að kaupa af fjár­fest­unum fyrir verð sem hann vill ekki gefa upp.  Fjár­fest­arnir hafa stað­fest að eigi húsið sem Elliði býr í ennþá. 

Segir land­fyll­ing­una gerða fyrir námu­fjár­festa í ÖlfusiSteinarr Lár, for­maður Brim­bretta­fé­lags Íslands, ræðir um land­fyll­l­ing­una í Ölfusi í við­tali við enska blaðið The Guardian. Þar segir hann að hann telji að land­fyll­ingin í Þor­láks­höfn sé gerð fyrir námu­fjár­festa í bænum.

Segir málið sýna spillingu

Að mati Stein­arrs Lár angar málið og aðkomu Elliða að því af spill­ingu. „Elliði býr frítt í húsi námu­fjár­fest­anna. Hann borgar ekki skatt eins og við hin til að borga af sínu hús­næði, hvort sem er í formi leigu eða kaupa á fast­eign­inni. Þetta er mjög sér­stakt. Þetta blasir við: Þetta er spill­ing, hrein og klár spill­ing. Hvernig get­urðu búið frítt í ein­hverju húsi sem er í eigu aðila sem á beina hags­muni af land­fyll­ing­unni?,“ segir hann við Heim­ild­ina. „Hvað þá það að þýða að hann búi frítt í þessu húsi? Hann ver sig svo með því að þykj­ast ekki vera kjör­inn full­trúi.“

Steinarr segir að Brim­bretta­fé­lagið hafi reynt að ræða við starfs­menn sveit­ar­fé­lags­ins og kjörna full­trúa í Ölfusi en að svo virð­ist sem allir standi og sitji eftir því sem Einar Sig­urðs­son námu­fjár­festir vill. „Það beygja sig allir bara undir hann Einar.“

Í sam­tali við Heim­ild­ina segir Elliði Vign­is­son, aðspurður um hvernig hann svari þess­ari gagn­rýni Stein­arrs: „Ég hef ekk­ert um þetta að segja. En ég spyr mig að því hvort þeir telja þetta lík­leg­ast til árang­urs í máli sem reynir á sam­vinnu.“

Fram­kvæmda­svæði Einars og HrólfsFram­kvæmda­svæði Einars og Hrólfs Ölv­is­sonar liggur að strand­lengj­unni í Þor­láks­höfn og flytja þeir meðal ann­ars út vikur þaðan.

Mynd: Heim­ildin

Einar hringdi út af hafnarframkvæmdunum

Heim­ildin hefur áður fjallað um afskipti Einars Sig­urðs­sonar af fram­kvæmdum við höfn­ina í Þor­láks­höfn.

Í við­tali við blaðið í byrjun árs­ins sagði bæj­ar­full­trúi í minni­hlut­anum í Ölfusi, Ása Berglind Hjálm­ars­dóttir,  að Einar Sig­urðs­son hafi hringt í hana og skammað hana eftir að hún gagn­rýndi að fyr­ir­hug­aðar fram­kvæmdir við höfn­ina í Þor­láks­höfn á þeim for­sendum gætu skemmt fyrir brim­bretta­fólki. „Hann hringir í mig. Ég hélt fyrst að hann ætl­aði bara svona að fara að ræða þetta og allt í lagi. Ég átti bara ágætis sam­tal við hann til að byrja með. Nema svo segir hann við mig: En þú veist það að þú hefur verið ágæt­lega liðin í þessu sam­fé­lagi fram að þessu en það mun breyt­ast ef þú heldur þessum áróðri áfram. Hann sagði þetta svona, bara orð­rétt.“

Í við­tal­inu við Heim­ild­ina sagði Ása Berglind enn frekar að hún hafi fyrst ekki áttað sig almenni­lega á því hvað Einar ætti við en svo hafi hún gert sér grein fyrir því að hann hafi verið að hóta henni. „Þetta tók svona smá tíma að súnka inn, þessi orð. Og það var ekki fyrr en ég hætti að tala við hann sem ég átt­aði mig á hvað hann var raun­veru­lega að segja við mig. Ég lít bara svo á að þetta hafi verið hótun. Að með því að tala um þetta mál þá myndi mann­orð mitt hljóta skaða af. Ég veit ekki hvernig hann ætl­aði að fram­kvæma það, eða hvernig hann ætl­aði að sjá til þess, en þetta sagði hann. Og svo var það ekki fyrr en aðeins seinna sem ég setti þetta í sam­hengi við það að hann nátt­úr­lega á þetta fyr­ir­tæki sem er þarna á hafn­ar­bakk­anum.“ 

Steinarr Lárr segir að Brim­bretta­fé­lag Íslands muni halda áfram að berj­ast gegn land­fyll­ing­unni í Þor­láks­höfn þar til yfir lýkur. „Við erum bara núna að vinna með lög­fræð­ingum. Málinu er ekki lokið af okkar hálfu, langt í frá.“