Allsherjarþing Sameinuðu þjóðanna samþykkti í gærkvöldi á neyðarfundi ályktun um tafarlaust vopnahlé fyrir botni Miðjarðarhafs. Ályktunin fól einnig í sér að hjálpargögn komist til þeirra sem eru í neyð og að almennum ísraelskum borgurum sem Hamas hafi tekið í gíslingu verði sleppt, en hermálayfirvöld í Ísrael segja að Hamas hafi nú að minnsta kosti 224 Ísraela í haldi. Þeirra á meðal séu 20 börn.
120 lönd samþykktu ályktunina, sem er ekki bindandi, á allsherjarþinginu, og 14 greiddu atkvæði gegn henni. 45 sátu hjá. Þeirra á meðal Ísland og öll hin Norðurlöndin nema Noregur sem samþykkti ályktunina.
Sú ákvörðun Íslands að sitja hjá hefur verið harðlega gagnrýnd víða á samfélagsmiðlum. Á meðal þeirra sem það gerðu er fyrrverandi utanríkisráðherra Íslands, Ingibjörg Sólrún Gísladóttir, sem gegndi því embætti á árunum 2007 til 2009. Í færslu á Facebook sagði hún: „Ísland greiddi því miður ekki atkvæði í dag með tillögu um tafarlaust vopnahlé í Gaza af mannúðarástæðum. Það gerðu heldur ekki hin Norðurlöndin - nema Noregur. Hvernig geta friðelskandi lýðræðisþjóðir fylgst álengdar og hlutlausar með þessum hræðilega Hildarleik?“
Sátu hjá vegna þess að ályktunin fordæmdi ekki Hamas
Utanríkisráðuneytið brást við í gærkvöldið með því að birta tilkynningu á vef stjórnarráðsins þar sem því var haldið fram að ómögulegt hefði verið „að ná samstöðu um texta ályktunarinnar sem tók ekki til grimmdarverka Hamas og tók ekki með beinum hætti á gíslatöku Hamas, en yfir 200 manns eru enn í haldi, þar af 30 börn.“ Ísland hefði lagt áherslu á mannúðarhlé „til að tryggja tafarlausa mannúðaraðstoð, harmaði gríðarlegt mannfall óbreyttra borgara og ítrekaði að þá yrði að vernda.“
Bjarni Benediktsson, sem tók við embætti utanríkisráðherra fyrr í þessum mánuði, tjáði sig svo um málið í færslu á Facebook í morgun. Þar ítrekar hann að sendinefnd Íslands á allsherjarþinginu hafi kallað skýrt eftir mannúðarhléi til að tryggja tafarlausa mannúðaraðstoð til óbreyttra borgara á Gaza. Á fundinum hafi Jórdanía lagt fram ályktun um ástandið á svæðinu fyrir hönd ríkja Arabahópsins, en ályktunin hafi ekki verið bindandi. „Ísland studdi ályktunina að því gefnu að breytingartillaga Kanada yrði samþykkt, þar sem hryðjuverk Hamas yrðu jafnframt fordæmd. Samstaða náðist ekki um það á þinginu og sat Ísland því hjá ásamt á fimmta tug ríkja, þar á meðal Bretlandi, Þýskalandi, Hollandi, Danmörku, Svíþjóð, Finnlandi og Eystrasaltsríkjunum. Það er miður að ekki hafi náðst samstaða á þinginu um að fordæma hryðjuverk.“
Bjarni segir það þó ekki breyta „skýrri afstöðu Íslands um tafarlaust mannúðarhlé, að komið verði á friði og byggt á tveggja ríkja lausninni. Ísland gerir skýra kröfu til Ísraels um að farið sé að mannúðarlögum.“
Fyrir þessu verður áfram talað af fullum þunga. Hvert dauðsfall meðal almennra borgara er einu dauðsfalli of mikið.
Þvílík hræsni!
Fyrst rústa efnahag samfélagsins í skjóli pabba svo,
rústa áliti heimsbyggðarinnar á Íslandi með einu pennastriki.
Talar einhver um að kjósa Sjálfgræðisflokkinn?
Hverjir???
- Það var hægt að fordæma hryðjuverkin með annari sjálfstæðri tillögu. En ályktarnir SÞ hafa aldrei haft neitt gildi svo það hefði ekki breytt neinu.