Ríkisstjórnin samþykkti í morgun minnisblað Willum Þórs Willumsonar heilbrigðisráðherra um að verja 225 milljónum á ársgrundvelli í aðgerðir til að sporna við skaða af völdum ópíóða. Í lok apríl kynnti Willum minnisblað í ríkisstjórn um að verja 170 milljónum árlega til verkefnisins og er þetta því hækkun upp á 55 milljónir. 

Allar þær aðgerðir sem kynntar voru í lok apríl standa en við bætast aðgerðir sem verða kynntar á næstu dögum. 

„Við samþykktum tillögur að mjög víðtækum aðgerðum,“ sagði Willum Þór í samtali við blaðamann Heimildarinnar að loknum ríkisstjórnarfundi í dag. Þar staðfesti hann að upphæðin nú væri 225 milljónir króna. 

Tillagan um milljónirnar 170 var rædd í ráðherranefnd um samhæfingu mála, ásamt fleiri aðgerðum á þessu sviði, breytingar urðu á tillögunum milli funda og upphæðin hækkaði. 

Ekki samstaða um skilgreiningu neysluskammta

Willum benti á að mikið hefði verið talað um afglæpavæðingu og að taka þurfi hana áfram inn í stefnumótunarhóp um skaðaminnkunarúrræði. 

Spurður hvort ekki liggi á afglæpavæðingu neysluskammta í ljósi þeirrar stöðu sem nú er uppi segir Willum að enn hafi ekki náðst niðurstaða um skilgreiningu á neysluskammti, hvorki á þingi né í starfshópum, og við blasi að heilbrigðisráðuneytið þurfi að fara í þéttara samstarf með dómsmálaráðuneytinu til að ná lausn í þessum málum.

Um alvarleika þess sem nú blasir við í málaflokknum segir Willum: „Þegar við ræðum þetta í þessu samhengi þá er eitt dauðsfall einu of mikið og tilefni til aðgerða.“

Flýtimótttaka, lyfjameðferð og aðgengi að neyðarlyfi

Meðal þeirra aðgerða sem áður voru kynntar var þróun á flýtimótttöku/viðbragðsþjónustu sem samstarfsverkefni SÁÁ, Landspítala og heilsugæslu þar sem einstaklingum í bráðum vanda verði tryggt aðgengi að gagnreyndri heilbrigðisþjónustu á borð við fráhvarfsmeðferð, vímuefnameðferð eða viðhaldsmeðferð sem mætir þeirra þörfum. 

Notendur fá tryggt aðgengi að gagnreyndri lyfjameðferð við ópíóðafíkn þar sem meðal annars eru notuð lyf eins og buprenorphin, metadon og í sumum tilfellum önnur ópíóíðalyf. 

Úrræði á vegum frjálsra félagasamtaka verða efld, svo sem Foreldrahús, sem sýnt hafa fram á árangur á sviði viðbragðsforvarna og snemmtækra inngripa fyrir ungmenni sem sýna forstigseinkenni vímuefnavanda og aðstandenda þeirra, með það að markmiði að koma í veg fyrir þróun frekari vanda eða fíknisjúkdóm. 

Tryggt verði að neyðarlyfið Naloxon í nefúðaformi sem notað gegn ópíóðaofskömmtun sé aðgengilegt fólki á landsvísu án endurgjalds, bæði í gegnum skaðaminnkunarúrræði og á heilsugæslum landsins.