Gullöld sjón­varps­þátta­gerðar virð­ist alltaf ná nýjum hæðum þessa dag­ana. Þegar við sófa­kart­öfl­urnar vorum rétt svo að jafna okkur á White Lotus frá­hvör­f­unum mætti ný þátta­röð af litlu svín­unum í Succession og öllum að óvörum birt­ist svo glæný þátta­röð frá A24, eða fram­leið­endum Everyt­hing all at once everywhere.

Sú nýja heitir Beef og skartar meðal ann­ars uppi­stand­ar­anum og leikkon­unni Ali Wong og leik­ar­anum Steven Yeun úr The Walking Dead. Þau leika hin van­stilltu Amy og Danny, ókunn­ugt fólk í Los Angeles sem lendir saman með ófyr­ir­séðum afleið­ingum. Þau eru bæði börn inn­flytj­enda en Amy er vel stæð kona sem á blóma­verk­stæði og er í þann mund að gera margra millj­óna samn­ing við ein­hvers konar Byggt og búið keðju. Danny er aftur á móti óhepp­inn blankur bygg­inga­verk­taki sem reynir sitt besta við að flytja for­eldra sína til Banda­ríkj­anna frá Kóreu eftir algjört gjald­þrot.

Amy og Danny verða fyrir því óláni að keyra næstum utan í hvort annað á bíla­stæði í Los Angeles. Í stað þess að stíga út úr bíl­unum og ræða málin eins og þroskaðir ein­stak­lingar, sendir Amy Danny fing­ur­inn sem verður til þess að hann umturn­ast af reiði og veldur bíla­elt­ing­ar­leik.

Málið vindur upp á sig og upp­hefst eins konar sturl­unga­öld knúin áfram af heift með hefndum sitt á báða bóga og nán­ast allir sem þau þekkja drag­ast inn í styrj­öld­ina á einn eða annan hátt. Sem hefnigjörn og almennt frekar van­stillt mann­eskja var auð­velt fyrir und­ir­rit­aða að setja sig í spor fólks­ins og þætt­irnir eru kær­komin til­breyt­ing frá gervi­ver­öld sam­fé­lags­miðla þar sem fólk kepp­ist um að vera besta útgáfan af sjálfum sér.

Bæði aðal­per­sónur og auka­per­sónur eru þrí­víðar, vel skrif­aðar og leik­ara­hóp­ur­inn allur til fyr­ir­myndar. Þegar líður á þátta­röð­ina og ófyr­ir­sjá­an­legt plottið vindur upp á sig, lekur súr­r­eal­ismi inn í þætt­ina eins og lappir á fíl eftir Salvador Dalí. Það eina sem hallar á upp­lifun­ina er sú hvim­leiða vit­neskja að David Choe, sem leikur glæpa­hneigðan frænda Danny, er mögu­lega kríp sam­kvæmt grein í Vice, en ég hef ekki enn þá fengið botn í því hvort hann sé dólgur sem talar fjálg­lega og er með mjög óvið­eig­andi kímni­gáfu eða alvöru kyn­ferð­is­glæpa­maður.