Ein af ástæðum þess að kín­verska ríkið hefur ákveðið að heim­ila aftur sölu á pakka­ferðum fyrir kín­verskra ferða­menn til Íslands í kjöl­far Covid-far­ald­urs­ins er að utan­rík­is­ráð­herra, Þórdís Kolbrún Reyk­fjörð Gylfa­dóttir, gaf það út í byrjun árs­ins að engar sér­stakar ferða­tak­mark­anir yrðu settar á Kínverja sem koma hingað til lands. Þetta kemur fram í svari frá  kín­verska sendi­ráð­inu á Íslandi við spurn­ingum Heim­ild­ar­innar.

Ísland er eitt af 40 löndum sem er á lista Kína yfir lönd sem byrja má að selja pakka­ferðir til aftur eftir bann við slíkum ferðum út af Covid-far­aldr­inum, líkt og kín­verska sendi­ráðið greindi frá í síð­ustu viku í til­kynn­ingu til fjöl­miðla. Frétta­stofa RÚV fjall­aði þá meðal ann­ars um ákvörð­un­ina í kvöld­fréttum sínum. 

Í svari kín­verska sendi­ráðs­ins til Heim­ild­ar­innar segir um þetta: „Í upp­hafi þessa árs til­greindi íslenski utan­rík­is­ráð­herr­ann að engar auka ferða­tak­mark­anir yrðu settar á ferða­menn frá Kína til að kom­ast inn til Íslands. Þessi nið­ur­staða byggði á vís­inda­legum rann­sóknum.  Íslenskir sér­fræð­ingar í lýð­heilsum­alum og emb­ætti ferða­mála­stjóra studdu þessa nið­ur­stöðu. Þetta er ástæðan fyrir því af hverju Ísland á vel skilið að vera á list­anum.“

Jöfn og mikil fjölgun í tíu ár

Í svari kín­verska sendi­ráðs­ins kemur fram fram hversu mikil fækkun hefur verið á komu kín­verskra ferða­manna hingað til lands vegna Covid á síð­ustu árum. Í fyrra komu ein­göngu rúm­lega 26 þús­und ferða­menn fra Kína hingað til lands á meðan þeir voru 114 þús­und árið 2019.

Koma kín­verskra ferða­manna hafði auk­ist jafnt og þétt á hverju ári frá 2010 þegar ein­ungis rúm­lega 5 þús­und ferða­menn frá land­inu komu hingað til lands en Covid setti svo strik í reikn­ing­inn. Til marks um þetta má benda á að í fyrra komu jafn margir ferða­menn frá Kína hingað til lands og árið 2014.

Koma fleiri ferða­manna frá Kína hingað til lands getur því skipt máli fyrir þjóð­ar­búið og íslensk ferða­þjón­ustu­fyr­ir­tæki.  Árið 2019 var Kína í fjórða sæti yfir þau lönd sem áttu flesta ferða­menn sem komu hingað til lands. 

Kína var ósátt við ferðatakmarkanir Evrópusambandsins

Ákvörðun Kína er tekið í kjöl­farið á því að Evr­ópu­sam­bandið ákvað að setja tak­mark­anir á mögu­leika kín­verskra ferða­manna til að ferð­ast til landa þess í upp­hafi árs­ins. Þetta var gert vegna Covid-far­ald­urs­ins þar í landi og byggði ákvörð­unin á til­mælum frá leið­toga­ráði Evr­ópu­sam­bands­ins. Ísland ákvað hins vegar að setja engar slíkar ferða­tak­mark­anir hér á landi. Meðal þess sem Evr­ópu­sam­bandið ákvað að gera var að skikka kín­verska ferða­menn til að taka Covid-próf áður en þeir heim­sækja ríkin. Banda­ríkin, Indland og Bretland voru meðal ann­arra ríkja sem einnig tóku upp hert­ari ferða­tak­mark­anir gagn­vart Kín­verjum í upp­hafi árs­ins. 

Út frá svari sendi­ráðs Kína er ljóst að þessi ákvörðun Íslands, að setja engar ferða­tak­mark­anir á Kínverja, spil­aði stórt hlut­verk í þeirri ákvörðun kín­verska rík­is­ins að leyfa aftur hóp­ferðir kín­verskra ferða­manna til Íslands.