Aukaspurningar:

Hver er konan á myndinni hér að ofan?

***

Aðalspurningar:

1.  Í febrúar settist Viðar Eggertsson leikari og leikstjóri á þing sem varamaður. Útlit var fyrir að hann myndi sitja fram í maí. Fyrir hvaða flokk?

2.  Í hvaða trúarbrögðum er mest lagt upp úr nírvana?

3.  Í hvaða borg í Bandaríkjunum var hljómsveitin Nírvana upprunnin?

4.  Í hvaða ríki Evrópu var Túdor-ættin við stjórnvölin á sínum tíma?

5.  Reyndar voru ekki nema fimm þjóðhöfðingjar af Tudor-ætt í viðkomandi ríki. Nefnið þrjá þeirra!

6.  Grandavegur 7 og Z Ástarsaga voru skáldsögur sem komu út á Íslandi á síðasta áratug 20. aldar. Hver skrifaði þær?

7.  En hver skrifaði bókina Umhverfis jörðina á 80 dögum?

8.  Í hvaða borg er Uffizi-listasafnið?

9.  Í hvaða heimsálfu er ríkið Gabon?

10.  Okhrana var fræg og raunar alræmd leyniþjónusta sem starfaði í ríki einu frá 1881 en lét sérstaklega að sér kveða á annan áratug eftir aldamótin 1900. En í hvaða ríki starfaði Okhrana?

***

Seinni aukaspurning:

Hvers vegna er þessi flugvél fræg? — Svo er lárviðarstig fyrir að geta nefnt flugvélartegundina nákvæmlega.

***

Svör við aðalspurningum:

1.  Samfylkinguna.

2.  Búddisma. Í hindúisma og fleiri indverskættuðum trúarbrögðum er hugmyndin um nírvana vissulega á kreiki en rannsóknir spurningahöfundar í trúarbragðafræði hafa fært honum heim sanninn um að „mest“ sé sannarlega lagt upp úr fyrirbrigðinu í búddisma.

3.  Seattle.

4.  Englandi. — Bretland er ekki rétt.

5.  Túdor-arnir voru Hinrik 7., Hinrik 8., Játvarður 6., María 1. (Blóð-María) og Elísabet 1. Aðeins þarf sem sé að nefna þrjá til að fá stig. Óþarfi er að muna númer Játvarðar.

6.  Vigdís Grímsdóttir.

7.  Jules Verne.

8.  Flórens.

9.  Afríku.

10.  Rússlandi.

***

Svör við aukaspurningum:

Á efri myndinni er Meryl Streep.

Flugvélin á neðri myndinni er fyrsta brúklega herþotan sem smíðuð var í heiminum. Hún var af gerðinni Messerschmitt 262.