Fyrri aukaspurning:

Hver málaði málverkið hér að ofan?

Og svo fæst lárviðarstig fyrir að vita hver er þarna að snæðingi?

***

Aðalspurningar:

1.  Á dögunum vakti athygli þegar Kristófer Kristófersson lauk með glæsibrag háskólaprófi í tiltekinni grein eftir að hafa áður lokið meistaraprófi í viðskiptafræði. Hvaða grein var það — býsna ólík viðskiptafræðinni — sem Kristófer lagði fyrir sig eftir að hafa lagt viðskiptafræðina á hilluna?

2.  Til hvaða eyjaklasa telst Luzon-eyja?

3.  Hvað er hæsta fjallið sem sést frá Reykjavík?

4.  Hverjir voru húgenottar?

5.  Hvað af þessum tæknifyrirtækjum á ekki uppruna sinn í Japan? Mitsubishi — Nintendo — Samsung — Sony — Toshiba — Yamaha.

6.  Leikkona sem fer með allstórt hlutverk í mynd Hilmars Oddssonar Á ferð með mömmu hefur áður gert garðinn frægan í myndum eins og Vonarstræti og Eiðinum, sem og útlensku sjónvarpsþáttunum Da Vinci's Demons og fleira. Hvað heitir hún?

7.  Við Beringssund og Alaska á Norður-Kyrrahafi býr sjaldgæfasta hvalategund heims en sumir telja að aðeins örfáir tugir hvala af tegundinni séu eftir. Þessi tegund er sú næstþyngsta í heimi á eftir steypireyði (hún er ekki næstlengst samt). Náfrændur tegundarinnar búa í Suður-Kyrrahafi og Atlantshafi og eru öllu fleiri, en reyndar ekki eins stórir. Hvaða hvalategund er þetta?

8.  Meðal þeirra listamanna sem fengu heiðurslaun Alþingis nú síðast var fyrrum ballerína sem nam við The Royal Ballet School í London 1961–1963. Hún dansaði þó ekki mikið á sínum tíma en kenndi dans og fleira við marga skóla gegnum tíðina. Einnig hefur hún fengist mikið við leikstjórn og reyndar komið víða við á starfsferlinum, stýrt listastofnunum, sinnt stjórnmálum, rekið gistiheimili o.fl. Hvað heitir hún?

9.  24. júní 1987 fæddist í borginni Rosario í Argentínu piltur sem þegar fyrir tvítugt var farinn að vekja athygli fyrir óvenjulega hæfileika á tilteknu sviði. Hann blómstraði brátt svo mjög að margir telja hann þann besta í heimi fyrr og síðar. Hvað heitir hann?

10.  Hvað heitir teiknarinn sem teiknar skopmyndir í Fréttablaðið á virkum dögum?

***

Seinni aukaspurning:

Hver er konan á myndinni hér að neðan?

***

Svör við aðalspurningum:

1.  Hjúkrunarfræði.

2.  Filippseyja.

3.  Snæfellsjökull.

4.  Mótmælendur í Frakklandi fyrr á tíð.

5.  Samsung er kóreskt fyrirtæki.

6.  Hera Hilmarsdóttir.

7.  Sléttbakur.

8.  Þórhildur Þorleifsdóttir.

9.  Messi.

10.  Halldór Baldursson.

***

Svör við aukaspurningum:

Efri myndina málaði Spánverjinn Goya. Hún sýnir guðinn Satúrnus. Þið fáið líka rétt fyrir Krónus, sem var sá gríski guð sem samsvaraði Satúrnusi.

Á neðri myndinni er Raquel Welch kvikmyndastjarna sem nýlega lést.