Aukaspurning hin fyrri:

Hver er svona kátur?

***

Aðalspurningar:

1.  Í hvaða heimsálfu lifa bavíanar nær eingöngu?

2.  Hvað heita blóðflokkarnir fjórir sem blóði okkar er skipt í? Við látum plús og mínus liggja milli hluta í þetta sinn.

3.  Í hvaða ríki er Yucatan-skagi fyrst og fremst?

4.  Suður af skaganum eru tvö ríki. Hvað heita þau? Það dugar að önnur uppástunga ykkar sé rétt.

5.  Kristín Einarsdóttir er nú formaður í félagi einu. Með henni í stjórn eru Ásta Ragnheiður Jóhannesdóttir varaformaður, ritari er Hjálmar Jónsson, gjaldkeri er Þuríður Backman og meðstjórnandi Valgerður Sverrisdóttir. Sennilega eru eða gætu verið á hverjum tíma eitthvað 100-200 manns í félaginu og á nokkurra ára fresti bætast mismargir sjálfkrafa við. Hvaða félag skyldi þetta vera? 

6.  Jón Arason biskup á Hólum átti fjóra syni. Tveir þeirra voru hálshöggnir með honum. Hvað hétu þeir? Bæði nöfnin verða að vera rétt.

7.  En Jón átti líka tvo aðra syni. Báðir voru þeir prestar á einu frægu og miklu prestssetri sem er í Aðaldal inn af Skjálfandaflóa, þó ekki samtímis, heldur hvor á fætur öðrum. Á prestssetrinu er gamall bær sem hefur verið lengi í umsjón Þjóðminjasafnsins. Hvaða prestssetur er þetta?

8.  En hvað hétu þessir tveir synir Jóns biskups sem þarna voru prestar? Hér dugar að nefna annan til að fá stig.

9.  Hávaxinn Svíi, ættaður sunnan frá Balkanskaga, er enn að spila fótbolta þótt orðinn sé fertugur. Hann hefur unnið mörg afrek og auk þess kunnur fyrir að hafa munninn fyrir neðan nefið. Hvað heitir hann?

10.  Hvað heitir þjóðarleikvangur Englendinga í fótbolta?

***

Aukaspurning sú seinni:

Hver er þetta?

***

Svör við aðalspurningum:

1.  Afríku. Þeir þekkjast reyndar á Arabíuskaga sem tilheyrir Asíu.

2.  A, B, O og AB.

3.  Mexíkó.

4.  Gvatemala og Belís.

5.  Félag fyrrverandi alþingismanna.

6.  Björn og Ari.

7.  Grenjaðarstaður.

8.  Magnús og Sigurður. Annað nafnið dugar sem sagt.

9.  Zlatan.

10.  Wembley.

***

Svör við aukaspurningum:

Á efri myndinni er Múmínpabbi. Múmínsnáðinn er að sjálfsögðu ekki rétt.

Á neðri myndinni er Kamala Harris.