Fyrri aukaspurning:

Hver á þennan hund?

***

Aðalspurningar:

1.  Hvað hafa íþróttaliðin New England Patriots og Pittsburgh Steelers unnið oftar en önnur íþróttalið?

2.  Hvaða land vann Eurovision-keppnina í fyrra?

3.  Ingibjörg H. Bjarnason settist fyrst kvenna á Alþingi fyrir 100 árum. En hún var brautryðjandi á fleiri sviðum. 1892 hafði hún lokið prófi í tiltekinni grein, fyrst kvenna, og hóf síðan kennslu í greininni í Reykjavík fyrir börn og ungar stúlkur. Hvað kenndi hún?

4.  Annar brautryðjandi í hópi kvenna var Geirþrúður Hildur Bernhöft sem lauk fyrst kvenna prófi í tiltekinni grein árið 1945 þótt hún tæki síðan aldrei við starfi af því tagi sem þessi menntun hennar kallaði á. Það liðu enn áratugir þar til kona tók slíkt djobb að sér. Hvað lærði Geirþrúður Hildur?

5.  Ólafur Þór Hauksson heitir maður sem gegnir mikilvægu starfi í samfélaginu þótt ekki láti hann mikið á sér bera persónulega. Hvað starfar hann?

6.  Sú var tíð að vísindamenn ímynduðu sér að mannkynið skiptist snyrtilega í þrjá „kynþætti“. Löngu er komið í ljós að allt það fimbulfamb var og er þvættingur einn, en við hvað var „hvíti kynþátturinn“ kenndur samkvæmt þessum kenningum? — og er orðið reyndar oft notað enn yfir hvítt fólk af evrópskum uppruna.

7.  Wisława Szymborska var ljóðskáld sem fékk Nóbelsverðlaun í bókmenntum 1996. Hún lést 2012. Hverrar þjóðar var Szymborska?

8.  Guðjón Valdimarsson skaust fram í sviðsljósið á síðasta ári í tengslum við ákveðið mál og var víst ekki ánægður með athyglina. Hvað fékkst Guðjón við sem vakti athygli á honum?

9.  Aðeins 14 sjálfstæð ríki voru hlutlaus alla síðari heimsstyrjöldina. Þar af voru 11 í Evrópu að einhverju eða öllu leyti. Nefnið 8 þeirra til að fá stig. Ef þið hafið öll 11 fáiði hlutleysisstig!

10.  Aðeins þrjú sjálfstæð hlutlaus ríki voru utan Evrópu en þá verður að hafa í huga að stórir heimshlutar voru í greipum evrópskra nýlenduvelda. En hver voru þessi þrjú hlutlausu ríki? Vitanlega dugar að nefna eitt!

***

Seinni aukaspurning:

Hér má sjá leikkonuna Kirsten Dunst í hlutverki sínu sem ... hver?

***

Svör við aðalspurningum:

1.  Ofurskálina, Superbowl.

2.  Úkraína.

3.  Hún lauk prófi í leikfimi og kenndi síðan dans og leikfimi, svo hvort tveggja dans og leikfimi eru rétt.

4.  Guðfræði.

5.  Hann er héraðssaksóknari.

6.  Kákasusfjöll.

7.  Pólsk.

8.  Byssusölu.

9.  Hlutlausu Evrópuríkin voru Svíþjóð, Írland, Spánn, Portúgal, Sviss, Tyrkland, Andorra, Monaco, Liechtenstein, San Marino og Vatíkanið.

10.  Sádi Arabía, Jemen og Afganistan.

***

Svör við aukaspurningum:

Andrés Önd og frændur hans þrír eiga hundinn þó hann birtist ekki í hverri sögu um þá.

Kirsten Dunst var að leika Marie Antoinette Frakkadrottningu.