„Ég er ekki bara inni­púki heldur líka stríðnis­púki og þess vegna segi ég að Reykja­vík sé aldrei betri en þessa helgi því að fíflin eru farin til Eyja.“ Þetta segir Ásgeir Guð­munds­son, einn skipu­leggj­enda hátíð­ar­innar Inni­púkans sem fram fer nú um versl­un­ar­manna­helg­ina.

Inni­púk­inn heldur upp á 20 ára afmæli sitt um þessar mundir, en hátíðin fór ekki fram síð­ustu tvö sumur vegna sam­komu­tak­mark­ana. „Það er nátt­úru­lega rosa­leg gírun í gangi,“ segir Ásgeir. „Þetta er búið að eiga langan aðdrag­anda. Við þurftum að aflýsa 2020 með dags fyr­ir­vara og fengum sex daga fyr­ir­vara í fyrra. Stefnir ekki í annað en að hátíðin fari fram í ár og verði frá­bær á sínu tuttug­asta ald­ursári.“

Ásgeir Guð­munds­son og Steinþór Helgi Arn­steins­sonSkipu­leggj­endur Inni­púkans segj­ast þakk­látir þeim sem stofn­uðu hátíð­ina fyrir 20 árum fyrir að veita Reyk­vík­ingum val­kost.

Mynd: Brynjar Snær

Í þetta sinn fer dag­skráin fram frá föstu­degi til sunnu­dags í Gamla bíó og á Röntgen með úti­svæði fyrir utan á Ing­ólfs­stræt­inu. Fram kemur margt af þekktasta tón­list­ar­fólki lands­ins, meðal ann­ars Bríet, Reykja­vík­ur­dætur, Snorri Helgason, Inspector Spacetime, Aron Can og Bassi Maraj. Hljóm­sveitin Bjartar sveiflur lokar svo hátíð­inni með sann­kall­aðri ball­stemmn­ingu á sunnu­dags­kvöld­inu.

Alltaf gott veður í Reykjavík

Aðspurður um hvaða þýð­ingu 20 ára afmæli hátíð­ar­innar hafi fyrir hann segir Ásgeir þakk­læti sér efst í huga. „Ég er þeim sem komu að stofnun Inni­púkans þakk­látur fyrir að hafa gert það, að bjóða Reyk­vík­ingum og inni­púkum og þeim sem nenna ekki að vera innan um allan þennan fjölda á tjald­stæðum lands­ins upp á pró­gramm og glæða borg­ina lífi. Ég var það ungur að ég fór ekki á fyrstu hátíð­ina sem var haldin 2002 í Iðnó. Þar voru Rúnk, Singa­pore Sling, Dr. Gunni og fleiri sem komu fram.“

Hann segir hátíð­ina mik­il­væga sem val­kost fyrir lands­menn um versl­un­ar­manna­helg­ina og að ekki skemmi fyrir að nú sé hún haldin á nýjum stað. „Gamla bíó er að okkar mati eitt flottasta tón­leika­hús lands­ins,“ segir Ásgeir. „Við munum svo loka göt­unni fyrir utan og vera með hið þver­sagna­kennda úti­svæði Inni­púkans. Við setjum upp svæði þannig að fólk geti kælt sig á milli tón­leika og þar ætlum við að vera með fata- og lista­markað. Ef veðrið verður slæmt, sem það verður ekki því það er alltaf gott veður í Reykja­vík, þá færum við mark­að­ina inn í and­dyrið á Gamla bíó. Það verður karni­val­stemmn­ing ef veður leyfir, en sá eini sem þarf ekki að hafa áhyggjur af veðr­inu um versl­un­ar­manna­helg­ina er Inni­púk­inn, því eins og nafnið ber með sér er okkar tón­list­ar­dag­skrá inn­an­dyra. Svo getur fólk bara farið heim til sín og sofið í eigin rúmi.“