„Við kynnt­umst í gær­kvöldi klukkan 23.10 á hosteli hér skammt frá sem við gistum bæði á. Við þekkt­umst ekk­ert fyrir klukkan 23.10,“ sagði Vanessa, sem er frá Kanada, þar sem hún stóð við hlaðna vegg­inn við Ing­ólfs­torg, ásamt sínum nýja vini, honum Tillman sem er frá Aust­ur­ríki. Það var fimmtu­dags­morg­unn og rign­ing­ar­suddi í mið­bænum og þau virt­ust dálítið ráð­villt. „Ég er að reyna að ná sam­bandi við bíla­leigu­fyr­ir­tækið til að afpanta bíl sem ég var búin að leigja,“ sagði Vanessa. „Við höfum aldrei komið hingað áður og já, við ætlum að fara saman í ferða­lag um Ísland,“ sagði Tillman og það vott­aði fyrir smá roða í kinnum þeirra beggja.

Smá skot?
Ást?
Fyrsti dagur fal­legrar vin­áttu?  

„Ég var búin að borga ein­hvers konar stað­fest­ing­ar­gjald fyrir leig­una á bílnum og vona að ég geti hætt við,“ sagði Vanessa. Hún var búin að ákveða að keyra fyrst um Suð­ur­land. Hann ætl­aði norður. Plön sem breytt­ust klukkan 23.10 á mið­viku­dags­kvöldi. Næstu daga ætl­uðu þau að fara saman, í allar áttir.