Ný íslensk kvikmynd, Berdreymi, hefur hlotið verðlaun á Berlinale kvikmyndahátíðinni sem nú stendur yfir. Samtök evrópskra kvikmyndahúsa, Europa Cinemas, völdu myndina sem bestu evrópsku kvikmyndina í Panorama flokki kvikmyndahátíðarinnar í Berlín.

Myndin var frumsýnd á hátíðinni síðasta föstudag og er hún önnur mynd Guðmundar Arnars Guðmundssonar leikstjóra í fullri lengd, en hann leikstýrði myndinni Hjartasteinn sem kom út árið 2016. Leikarahópurinn úr myndinni var viðstaddur hátíðina, mikið til ungt fólk sem var að stíga sín fyrstu skref í leiklistinni. Anton Máni Svansson, framleiðandi myndarinnar, tók á móti verðlaunum í Berlín fyrir hönd hópsins. 

Í tilkynningu frá framleiðendum myndarinnar segir að verðlaunin séu þýðingarmikil þar sem Samtök evrópskra kvikmyndahúsa muni styðja við dreifingu myndarinnar um alla Evrópu eða í allt að 1143 kvikmyndahúsum í 44 löndum sem eru hluti af samtökunum. Á ensku hefur myndin fengið titilinn Beautiful Beings.

Úr BerdreymiMyndin fer í dreifingu í fjölda kvikmyndahúsa erlendis.

„Önnur mynd Guðmundar veitir sannarlega harða sýn á hóp unglingsdrengja sem reyna að finna veginn áfram þrátt fyrir að tengja illa við brotnar fjölskyldur sínar,“ segir meðal annars í orðum dómnefndarinnar. „En það er hlýjan, samhliða ofbeldinu, sem gerir þetta að mynd sem fólk verður að sjá.“

Fjallar um ofbeldi og vináttu ungmenna

Berdreymi segir frá Adda, unglingsstrák í Reykjavík sem alinn er upp af móður með skyggnigáfu. Einn daginn ákveður Addi að taka eineltisfórnarlamb undir sinn verndarvæng og inn í vinahóp slagsmálahunda. Án eftirlits, leika strákarnir sér að eyðileggingu og ofbeldi en kynnast einnig sannri vináttu. Þegar hegðun strákanna stigmagnast yfir í lífshættulega atburði, fer Addi að upplifa eigin skynjanir.

Guðmundur Arnar skrifaði handritið og með aðalhlutverk fara ungstirnin Birgir Dagur Bjarkason, Áskell Einar Pálmason, Viktor Benóný Benediktsson, og Snorri Rafn Frímannsson, ásamt þeim þaulreyndu Anítu Briem, Ólaf Darra Ólafssyni og Ísgerði Gunnarsdóttur. Framleiðandi myndarinnar er Anton Máni Svansson fyrir hönd Join Motion Pictures, en myndin er samstarfsverkefni fimm landa með meðframleiðendur frá Danmörku, Svíþjóð, Hollandi og Tékklandi.