Nýr oddviti Flokks fólksins í Norðausturkjördæmi, tónlistarmaðurinn Jakob Frímann Magnússon, vill lækka skatta á Íslandi. Fram að þessu hefur Flokkur fólksins ekki lagt áherslu á skattalækkanir, ef frá er talin skattlagning fátækra, en í viðtali við Bítið á Bylgjunni í morgun lýsti Jakob Frímann því að skattlagning launa væri almennt of mikil og svo neysluskattar á eldsneyti og áfengi.
„Við hvert fótmál ertu skattaður,“ sagði hann. „Bensínlítrinn fer 70% til ríkisins, bjórlítrinn sömuleiðis. Þetta er allt svo ofboðslega mikið okur ríkisins, uppsafnað á 70 árum. Og þessu okri þarf að linna. Þetta er ok á þegnunum og við þurfum bara að stemma þetta niður.“
Þá ítrekaði Jakob Frímann að „það þarf til lengri tíma að lækka skatta á Íslandi, þannig að menn eigi meira eftir af laununum sínum um hver mánaðarmót, vegna þess að hér er eitt dýrasta okurland í heiminum.“
Jakob Frímann lýsir Flokki fólksins sem „hægri krataflokki“, líkum Alþýðuflokknum sem á sínum tíma sameinaðist Alþýðubandalaginu og varð að Samfylkingunni.
Nóg til af peningum
Fram að þessu hefur Flokkur fólksins lagt áherslu á að skattleggja lífeyrisgreiðslur þegar þær eru greiddar til lífeyrissjóðs frekar en þegar þær eru greiddar út til lífeyrisþega. Þá hefur meginstefið í starfi flokksins verið að minnka skerðingar á greiðslum til lífeyrisþega.
Flokkurinn hefur ekki haft á stefnuskrá sinni að lækka almennt skatta. Almennar skattalækkanir hafa hins vegar hefðbundið verið baráttumál hægri flokka, líkt og Sjálfstæðisflokksins og Viðreisnar. Algengara er að vinstri flokkar forðist almennar skattalækkanir þar sem skattgreiðslum er meðal annars ætlað að fjármagna þjónustu til tekjulægri, sem og atvinnuleysisbætur, örorkubætur og svo framvegis.
„Það er nóg til, það þarf bara að skipta því rétt,“ sagði Jakob í morgun. Jakob Hann vill sækja fjármagn í ríkissjóð með því að „fínstilla kerfið“, enda hafi sýnt sig eftir hrun að mikið fjármagn hafi verið í bankakerfinu, „á sjöunda hundrað milljarða sem allt í einu duttu inn“. „Ekki var því skilað inn til fólksins sem tapaði öllu sínu í hruninu, eða átti þessa peninga,“ sagði hann. Auk þess komi fjármagn í ríkissjóð við kvótasetningu eldislax á landi, en hann segir þó að „það þarf ekkert að skattleggja það meira en annað“.
Að mati Jakobs Frímanns er hins vegar til nóg af peningum í kerfinu, ekki síst í lífeyriskerfinu, þar sem eru „þessir bólgnu sex þúsund milljarðar“. „Vandamálið er að koma þessu í vinnu, þetta er svo mikið,“ sagði hann í morgun.
Mælist utan þings
Flokkur fólksins fékk fjóra þingmenn í síðustu alþingiskosningum, en tveir þeirra gengu til liðs við Miðflokkinn eftir umdeildan fund á Klaustur bar við hlið Alþingis. Í síðasta þjóðarpúlsi Gallups mældist flokkurinn með 4,1% fylgi, en Sósíalistaflokkur Íslands með 6,7%.
Jakob sagði að hann hafi ákveðið að fara í framboð eftir að formaðurinn, Inga Sæland, sem hann kallar „hjartadrottningu úr háfjallabyggð“ sem „eldur Guðs renni í gegnum“, skoraði á hann til framboðs.
Hann sagðist „ekki kvarta beint undan hinum flokkunum“ enda hafi hann átt við þá gott samstarf. Málin hafi einfaldlega ekki „verið sett almennilega á dagskrá“.
„Þetta er engum að kenna. People are busy doing something else. Það eru aðrar áherslur í flestum þessara flokka. Svo kemur þessi hreini, tæri tónn frá þessari hjartadrottningu í háfjallabyggð, og hennar áum, og ég viðurkenni bara að mér fannst ég bara vera búinn að finna miunn gamla alþýðuflokk, sami hreini, tæri tóninnn. Og það nota bene var hægri krataflokkur, þar sem voru til einstaklingsmenn með félagslegar áherslur eða félagshyggjumenn með einstaklingsframtak og markaðskerfi að leiðarljósi. Við viljum auðvitað það, við viljum engan kommúnisma eða alræði einhvers eins, við viljum bara fyrirmyndarsamfélag.“
Athugasemdir