Báðar myndaspurningarnar eru að þessu sinni úr landafræðinni. Á myndinni hér að ofan er sól sem prýðir fána ríkis eins í veröldinni. Mjög svipuð sól — þó með aðeins færri geislum — prýðir jafnframt fána nágrannaríkis. Hvað heita þessi tvö sólarríki — og já, bæði verður að nefna.

***

Aðalspurningar:

1.  Coco Gauff heitir 17 ára bandarísk íþróttastúlka sem ætlaði að vera með á ólympíuleikunum í Tókíó en smitaðist af Covid-19 nokkru áður en leikarnir áttu að hefjast. Gauff þykir einkar efnileg og gæti á næstu árum komist á toppinn í ... hvaða íþróttagrein?

2.  Úr því Tókíó barst í tal, þá skal hér upplýst að sú borg bar lengi framan af allt annað nafn. Það var ekki fyrr en 1868 sem nafninu borgarinnar var breytt í Tókíó. Hvað hét borgin áður?

3.  Góði dátinn Sveijk heitir bók ein. Hvað heitir höfundurinn?

4.  Á hvaða tungumáli var sagan skrifuð?

5.  Hver las íslenska þýðingu hennar í útvarpið svo að frábær rómur var gerður að?

6.  Hvaða tónlistarmaður náði gífurlegum vinsældum með lagið My Heart Will Go On árið 1997?

7.  Lagið skreytti kvikmynd eina, sem einnig varð vinsæl mjög. Hvaða mynd var það?

8.  Rithöfundur einn hefur vakið athygli fyrir snarpa pistla á Rás eitt Ríkisútvarpsins síðustu árin, en einnig fyrir bækurnar Vince Vaughn í skýjunum, sem kom út árið 2013, Drón (2014), Aftur og aftur (2017) og Bróðir (2020). Hvað heitir höfundurinn?

9.  Hvað er það sem kallast süt á tyrknesku, gatas á tagalok, mleko á slóvensku, сүү á mongólsku, piim á eistnesku, maiko á finnsku, şîr á kúrdísku, caaano á sómölsku, leche á spænsku og పాలు á telúgú sem talað er í Andra Pradesh á Indlandi?

10.  Hér fylgja á eftir nöfn á nokkrum misstórum þéttbýliskjörnum á Suðurlandsundirlendinu. Nema hvað eitt nafn er EKKI þéttbýliskjarni á Suðurlandi: Brautarholt, Flúðir, Laugarbakki, Laugarás, Laugarvatn,  Reykholt, Sólheimar, Þykkvibær.

 ***

Seinni myndaspurning:

Hvaða sögufræga stöðuvatn er það sem sést hér skáhallt úr suðri á Google Earth?

***

Svör við aðalspurningum:

1.  Tennis.

2.  Edo.

3.  Hasek.

4.  Tékknesku.

5.  Gísli Halldórsson.

6.  Celine Dion.

7.  Titanic.

8.  Halldór Armand.

9.  Mjólk.

10.  Laugarbakki er á Norðurlandi vestra, alla hina staðina má finna á Suðurlandsundirlendinu (Reykholt líka!).

***

Svör við myndaspurningum:

Sólin á efri myndinni prýðir fána Argentínu en systursólina er hins vegar að finna á fána Úrúgvæ.

Sjá hér:

Fáni Argentínu

Fáni Úrúgvæ

 ***

Á neðri myndinni er Galíleuvatn, einnig kallað Genesaretvatn.