Hér er hlekkur og er klikkað er á hann birtist þrautin síðan í gær!

***

Fyrri aukaspurning:

Hver málaði svefnherbergið sitt eins og sést á myndinni hér að ofan?

***

Aðalspurningar:

1.    Böddi Steingríms var bloggari sem þótti „of gáfaður fyrir Krókinn, of reiður fyrir Reykjavík og of hreinskilinn fyrir Ísland“, eins og segir á einum stað. Enda fór allt í hundana hjá honum að lokum! Hvar má lesa um Bödda Steingríms?

2.   „Ég er fegurðardrottning / og brosi gegnum tárin.“ Hver söng?

3.   Jóhannes Eðvaldsson fótboltamaður dó á dögunum. Hann fór víða á ferli sínum en er frægastur fyrir að spila af miklum dugnaði fyrir fótboltalið eitt í Glasgow á Skotlandi. Hvaða lið var það?

4.   „Sú var tíðin að ég fór oftast snemma í rúmið.“ Þannig hefst fræg frönsk skáldsaga, gríðarlangt verk í mörgum bindum, sem byrjaði að koma út 1913. Þar er fjallað á einkar nærfærinn (og orðmargan) hátt um endurminningar og eftirsjá enda heitir bókin À la recherche du temps perdu, sem Pétur Gunnarsson þýddi sem Í leit að glötuðum tíma. En hvað hét höfundurinn sem fór oftast snemma í rúmið?

5.   Hvað kallast skíðasvæðið við Akureyri?

6.   Hverjir áttust aðallega við í hundrað ára stríðinu 1337 til 1453?

7.   „The immunity is back up for grabs. — Friðhelgi er aftur orðin keppikefli.“ Í hvaða bandarísku raunveruleikaþáttum — sem þegar eru komnar 40 seríur af — er þetta lykilsetning?

8.   Hvar var biskup Íslands á undan Agnesi núverandi biskupi?

9.   Í hvaða ríki er höfuðborgin Lima?

10.   39529 Vatnajökull, 85095 Hekla og 110299 Iceland eru svo sannarlega ekki jökull, eldfall og eylandið okkar, heldur fjarlæg náttúrufyrirbæri af allt öðru tagi. Hvaða fyrirbæri bera þessi nöfn og númer? 

***

Seinni aukaspurning:

Þarna má sjá leikkonurnar Kristen Stewart og Jodie Foster í kvikmynd David Finchers frá 2002. Þær leika mæðgur. Móðirin grípur til örþrifaráða til að vernda sig og dótturina undan glæpamönnum. Hvað heitir myndin?

***

Svör við aðalspurningum:

1.   Í Roklandi Hallgríms Helgasonar.

2.   Ragnhildur Gísladóttir.

3.   Celtic.

4.   Proust.

5.   Hlíðarfjall.

6.   Bretar og Frakkar.

7.   Survivor.

8.   Karl Sigurbjörnsson.

9.   Perú.

10.   Þetta eru smástirni úti í geimnum.

***

Svör við aukaspurningum:

Myndina af svefnherberginu málaði Van Gogh.

Bíómyndin hét Panic Room.

***

Já, eins og fyrir töfra birtist hér hlekkurinn á þrautina síðan í gær.