***
Fyrri aukaspurning:
Það verður að viðurkennast að hún er ekki fyrir ungt fólk. En þau sem komin eru nokkuð á miðan aldur og það af lengra, þau er vonandi óhætt að spyrja: Hver er á myndinni hér að ofan?
***
Aðalspurningar:
1. Vísindamaðurinn Sanchez býr hjá Beth Smith dóttur sinni og Jerry eiginmanni hennar. Sanchez er drykkfelldur, geðstirður, sjálfhverfur, illskeyttur, ofstopafullur og alveg ódrepandi dóni. Hann fer gjarnan í ferðalög um geiminn og aðrar víddir með dóttursyni sínum, sem er prúður piltur en þó lítill eftirbátur afa sínum í ævintýrunum. Um er að ræða vinsæla teiknimyndaseríu sem heitir eftir fornöfnum Sanchez vísindamanns og dóttursonar hans. Og serían heitir þá ...?
2. Síðari heimsstyrjöldin hófst 1939 þegar Þýskaland og síðar Sovétríkin réðust á ... hvaða land?
3. Frakkar gerðu síðan málamyndainnrás í Þýskaland en sú aðgerð var öll í skötulíki. En hvaða land var því næst ráðist á í styrjöldinni?
4. Íslenskur rithöfundur gekk á fund Hitlers og spjallaði við hann á útmánuðum 1940. Því miður fékkst rithöfundur þessi aldrei til að lýsa fundinum með þýska foringjanum. En hver var rithöfundurinn?
5. Audrey Tatou heitir frönsk leikkona, hálffimmtug núna. Árið 2001 sló hún í gegn í afar kostulegri bíómynd, þar sem hún lék einkar lífsglaða stúlku sem er ákveðin í að gera sem flesta í kringum sig hamingjusama og ánægða. Og myndin jók allavega ánægju flestra sem hana sáu. Hún hét eftir persónunni sem Tatou lék, það er að segja ...?
6. Hver er stærsta eyjan sem tilheyrir Frakklandi?
7. Hinir svokölluðu kóalabirnir eru snotrir og sætir og huggulegir og margt fleira, en eitt eru þeir þó alls ekki. Hvað er það?
8. Hvar búa kóalabirnirnir?
9. „Allt uns festing brestur“ heitir bók með trúarljóðum undir dróttkvæðum hætti sem prestur einn hefur nýlega gefið út. Hver er presturinn?
10. Í hvaða firði eru Æðey og Vigur?
***
Seinni aukaspurning:
Hvaða fræga fjall er þetta?
***
Svör við aðalspurningum:
1. Rick and Morty.
2. Pólland.
3. Finnland.
4. Gunnar Gunnarsson.
5. Amélie.
6. Korsíka.
7. Birnir. Þeir eru alls óskyldir björnum, enda pokadýr.
8. Ástralíu.
9. Davíð Þór Jónsson.
10. Ísafjarðardjúpi.
***
Svör við aukaspurningum:
Á efri myndinni er sparibaukurinn Trölli.
Skoðið endilega hina glæsilegu sjónvarpsauglýsingu sem sjá má hér til hliðar (eða ofan eða neðan eða einhvers staðar annars staðar ef þið eruð að skoða þetta í síma!).
Á neðri myndinni er Hekla.
***
Athugasemdir