Tilkynningum um kynferðisbrot til lögreglunnar á höfuðborgarsvæðinu fækkaði verulega á síðasta ári miðað við meðaltal áranna 2017-2019. Tilkynnt var um 260 kynferðisbrot á árinu og er það 29 prósenta fækkun frá fyrri árum. Fækkun tilkynntra brota skýrist að verulegu leyti af fækkun tilkynninga vegna nauðgana en þeim fækkaði um tæplega 46 prósent á síðasta ári borið saman við meðaltal síðustu þriggja ára á undan.

Hins vegar fjölgaði heimilisofbeldismálum sem komu inn á borð lögreglunnar talsvert, eða um 9 prósent milli ára. Karlar eru gerendur í yfirgnæfandi tilfellum í heimilisofbeldismálum en á síðasta ári voru 78 prósent gerenda karlar. Konur eru þá þolendur í ríflega tveimur þriðju hlutum tilfella eða í 69 prósentum tilfella. Fjöldi líkamsárásarmála stendur í stað milli ára þrátt fyrir fjölgun heimilisofbeldismála.

Svipaður fjöldi hegningarlagabrota og verið hefur

Þetta kemur fram í bráðabirgðatölum lögreglunnar á höfuðborgarsvæðinu um afbrot á síðasta ári. Árið 2020 voru skráð tæplega 9.400 hegningarlagabrot hjá lögreglunni sem er svipaður brotafjöldi og árið 2019. Það jafngildir rúmlega 21 hegningarlagabroti á hverjum sólarhring að meðaltali. Hins vegar voru skráð mál hjá lögreglunni um 77.000 á síðasta ári, eða um 211 mál á sólarhring. Hegningarlagabrot voru því ríflega tíu prósent allra mála.

Fjöldi þjófnaða var svipaður á síðasta ári og verið hefur fyrri ár en innbrotum fækkaði um tæp 14 prósent miðað við meðalfjölda áranna á undan. Innbrotum á heimili fækkaði um tæplega 10 prósent miðað við fyrri ár og innbrotum í ökutæki fækkaði um tæplega 40 prósent. Á sama tíma fjölgaði innbrotum í fyrirtæki um 14 prósent frá fyrri árum.

Mun færri fullir undir stýri

Töluverð fækkun varð á fíknilagabrotum milli ára en rúmlega 1.000 slík brot voru skráð hjá lögreglunni á höfuðborgarsvæðinu á síðasta ári. Það er 30 prósenta fækkun frá meðaltali áranna á undan.

Umferðalagabrotum fækkaði einnig umtalsvert en ríflega 25 þúsund slík brot voru skráð á síðasta ári. Það er um 21 prósent fækkun frá meðaltali áranna 2017-2019. Mest fækkaði brotum við banni á akstri undir áhrifum áfengis, um ríflega 40 prósent milli ára. Fjöldi brota gegn akstri undir áhrifum fíkniefna stóð hins vegar nokkurn veginn í stað.

Þá voru skráðar um 1.200 tilkynningar hjá lögreglu vegna gruns um brot gegn sóttvörnum, sóttkví eða einangrun vegna Covid-19. Í um það bil tíu prósent tilvika leiddu tilkynningar til þess að lögregla hóf nánari rannsókn, í 54 tilvika vegna gruns um brot gegn sóttkví og einangrun en í 79 skipti vegna gruns um brot gegn sóttvörnum. Tæplega 130 manns hafa verið grunaðir um slík brot, að miklum meirihluta karlar eða í 76 prósentum tilvika. Meðalaldur þeirra sem grunaðir eru um slík brot er 38 ár.