Ef þið smellið hér, þá birtist þrautin síðan í gær eins og fyrir galdra.

***

Fyrri aukaspurning: 

Hvað heitir togarinn sem sjá má hluta af á myndinni hér að ofan?

***

Aðalspurningar:

1.   Fótboltafélagið Liverpool er sigursælasta fótboltafélagið í Liverpool. En í borginni eru fleiri fótboltafélög. Hvað heitir það næst sigursælasta þar í borg?

2.   Árum saman hefur Þjóðleikhúsið haldið úti sama barnaleikriti á aðventunni í desember. Þangað til núna að sýningar falla niður vegna kófsins. Höfundur leikritsins er Þorvaldur Þorsteinsson. Hvað heitir það?

3.   Hvað heitir höfuðborgin í Armeníu?

4.   Hver er kvaðratrótin af 81?

5.    Hvaða íslenski rithöfundur skrifaði bókina Ofvitann?

6.   Hverrar þjóðar var tónskáldið Jean Sibelius?

7.   Í hvaða hljómsveit syngur Nanna Bryndís Hilmarsdóttir og spilar á gítar?

8.   Hvað kallast hafstraumurinn sunnan úr höfum sem gjarnan er sagður halda hita á Íslandi?

9.   Fyrir hvað komst Ása Finnsdóttir á spjöld sögunnar á Íslandi?

10.   Árið 79 eftir Krist lést rómverski embættismaðurinn og náttúruspekingurinn Pliníus eldri mjög sviplega. Til er lýsing á dauðastund hans eftir nafna hans og frænda og þar kemur fram að líklega urðu eitraðar lofttegundir honum að bana. Hvað var eiginlega að gerast?

***

Seinni aukaspurning:

Í hvaða stríði um miðbik 20. aldar er þessi ljósmynd tekin?

***

Svör við aðalspurningum:

1.   Everton.

2.   Leitin að jólunum.

3.   Jerevan.

4.   9.

5.   Þórbergur Þórðarson.

6.   Finnskur.

7.   Of Monsters and Men.

8.   Golfstraumurinn.

9.   Hún var fyrsta sjónvarpsþulan.

10.   Eldgos í Vesúvíusi. Gosið sem færði Pompeii og fleiri bæi á kaf í eitraða ösku.

***

Svör við aukaspurningum:

Togarinn er að sjálfsögðu Heinaste sem Samherji hélt úti til veiða við Namibíu og kemur víða við sögu í Samherjamálum.

Hér má sjá hann betur:

Heinaste siglir á sjónum

Neðri ljósmyndin var aftur á móti tekin í Kóreustríðinu, enda er það fáni Norður-Kóreu sem sjá má veifað.

***

Og ef þið hafið enn gleymt þrautinni síðan í gær, þá er að smella hér.