Mælaborð Tryggingastofnunar hefur verið óvirkt og ekki í birtingu á vef stofnunarinnar frá því í júní síðastliðnum. Ástæðan er gjaldþrot Capacent á Íslandi en fyrirtækið sá um rekstur mælaborðsins fyrir stofnunina.

Staðan þykir afar bagaleg sökum þess að inni á mælaborðinu var birt ýmislegt talnaefni tengt rekstri og hlutverki Tryggingastofnunar sem hefur því ekki verið aðgengilegt síðasta hálfa árið. Inni á mælaborðinu mátti meðal annars finna upplýsingar um réttindi skjólstæðinga Tryggingastofnunar, fjöldaþróun lífeyrisþega, greiðslur frá Tryggingastofnun og útgjöld til til málaflokksins. Þá mátti einnig finna þar niðurbrot eftir kyni, aldri og búsetu auk fleiri þátt. Þá voru umrædd gögn sömuleiðis nýleg í hverju tilfelli.

Tryggingastofnun hyggst sjálf reka nýtt mælaborð

Sigrún Jónsdóttir, staðgengill forstjóra Tryggingastofnunar, segir að það skipti stofnunina miklu máli að almenningur og viðskiptavinir geti fengið greinargóðar upplýsingar á vef stofnunarinnar, bæði um réttindi sín, en einnig um tölur er varði almannatryggingar almennt. Gögnin sem hafi verið birt á mælaborðinu séu framsetning á tölfræði úr gagnagrunni stofnunarinnar og séu öll til staðar.

„Unnið hefur verið að því frá því í júlí að endurhanna útlitið og finna góð forrit til að birta tölfræðiupplýsingar af þessu tagi. Það er nú þegar búið að leggja töluverða vinnu innan Tryggingastofnunar í að setja gögnin þannig upp að hægt verði að birta þau á ný,“ segir Sigrún í svari við fyrirspurn Stundarinnar.

„Innan stofnunarinnar var ekki þekking á kerfum sem eru nauðsynleg til að birta tölfræðigögn“

Samið var við Capacent um rekstur mælaborðsins í mars árið 2018. „Það var talið skynsamlegt í ljósi þess að innan stofnunarinnar var ekki þekking á kerfum sem eru nauðsynleg til að birta tölfræðigögn með þessu móti og því ekki starfsfólk innanhúss til að sinna því verkefni,“ segir Sigrún. Tryggingastofnun mun hins vegar sjálf sjá um uppsetningu og rekstur nýs mælaborðs og segir Sigrún að gert sé ráð fyrir að það fari í loftið á næstu vikum.

Á þeim rúmu tveimur árum sem Capacent sá um rekstur mælaborðsins greiddi Tryggingastofnun alls 4.322.500 krónur til fyrirtækisins, án virðisaukaskatts. Ekki er ljóst hvaða kostnaður mun hljótast af því að þurfa að setja upp nýtt mælaborð á vef stofnunarinnar.

Uppfært 23. nóvember:

Nýtt mælaborð Tryggingastofnunar er komið í gagnið og virkt á heimasíðu stofnunarinnar.