Skúli Mogensen hefur selt sum­ar­bú­stað sinn í Hval­firði og tvær jarðir til félags í eigu föð­urs síns. Það fékk Skúli að gera með heim­ild Arion banka en Skúli veð­setti bank­anum umræddar eignir fyrir 160 millj­ónir króna í sept­em­ber 2018 þegar hann reyndi, án árang­urs, að bjarga flug­fé­lag­inu WOW air frá falli.

Skúli átti sum­ar­bú­stað á jörð­inni Hvammi, jörð­ina sjálfa og auk þess jörð­ina Hvamms­vík en jarð­irnar tvær liggja saman inn­ar­lega í Hval­firði sunn­an­verðum.

Ánægður með að sumarbústaðurinn verði áfram innan fjölskyldunnar

Skúli var fáorður um málið þegar Stundin náði tali af honum. „Ég hef ekk­ert um þetta að segja,“ sagði Skúli.

„Ég er vissu­lega mjög ánægður með það“ 

Þegar hann var inntur eftir því hvort ekki væri gleði­legt að jarð­irnar og sum­ar­bú­stað­ur­inn héld­ust innan fjöl­skyld­unnar svar­aði Skúl: „Ég er vissu­lega mjög ánægður með það og úr því að þú spyrð þá greiddu þau [for­eldrar Skúla] tölu­vert hærra verð en fast­eigna­mat, svo það sé á hreinu.“ 

Fast­eigna­mat jarð­anna tveggja og sum­ar­bú­stað­ar­ins nemur sam­tals 102 millj­ónum króna. Þar vegur jörðin Hvammur mest, rúmar 48,5 millj­ónir króna. Sum­ar­bú­stað­ur­inn er met­inn á 27,6 millj­ónir króna og Hvamms­vík á 25,8 millj­ónir króna. 

Þarf að greiða 160 milljónir á tveimur árum

Kaupandi sum­ar­bú­staðs­ins og jarð­anna er félagið Flúðir ehf. sem er í eigu Brynj­ólfs Árna Mogensen, bækl­un­ar­læknis og föður Skúla. Arion banki lánar Flúðum fyrir kaup­unum, alls 160 millj­ónir króna. Af þeirri upp­hæð er félag­inu hins vegar skilt að greiða þegar 35 millj­ónir króna beint aftur til bank­ans, auk lán­töku­gjalds og kostn­aðar við skjala­gerð upp á rúmar 800 þús­und krónur. Eftir sem áður á Arion banka veð í eign­unum. Athygli vekur að láns­tím­inn er óvenju stuttur, aðeins 24 mán­uðir. 

Samkvæmt árs­reikn­ingi Flúða ehf. fyrir árið 2019 nam hagn­aður félags­ins það ár tæpum þremur millj­ónum króna, og byggð­ist hagn­að­ur­inn því sem næst ein­göngu á rekstr­ar­tekjum. Eigið fé félags­ins í árs­lok nam rúmum 11,6 millj­ónum króna. Hvernig félagið hyggst standa skil á láni að upp­hæð 160 millj­ónir króna á næstu tveimur árum er því ekki ljóst en miðað við eignir og veltu þess gæti það reynst örð­ugt.

Gerði allt sem hann gatSkúli Mogensen gerði allt sem hann gat til að bjarga rekstri WOW air og veð­setti meðal ann­ars fast­eignir sínar sem Arion banki hefur nú tekið yfir eða haft milli­göngu um að selja upp í skuldir hans við bank­ann.

Mynd: Sigurjón Ragnar

Veðsetti eignirnar fyrir WOW

Í sept­em­ber árið 2018, þegar Skúl réri líf­róður til að reyna að halda flug­fé­lag­inu WOW air á floti, veð­setti hann eignir sínar, að öllum lík­indum til að fjár­magna þátt­töku sína í skulda­bréfa­út­boði WOW sem þá stóð yfir og var ætlað til að reyna að koma í veg fyrir gjald­þrot flug­fé­lags­ins. Það tókst ekki og WOW fór í þrot 28. mars 2019.

 „Ég setti aleig­una í þennan rekstur.“

Í við­tali við RÚV þegar gjald­þrotið WOW air lá fyrir sagð­ist Skúli hafa sett allt sitt í flug­fé­lagið til að bjarga því: „Ég setti aleig­una í þennan rekstur.“

Skúli fjár­festi sjálfur í skulda­bréfum í félag­inu fyrir 770 millj­ónir króna. Skömmu áður hafði Skúli fengið útgefin tvö trygg­inga­bréf hjá Arion banka alls að upp­hæð 733 millj­ónir króna. Öðru trygg­inga­bréf­inu var þing­lýst á heim­ili Skúla að Hrólf­skála­vör á Sel­tjarn­ar­nesi, upp á 358 millj­ónir króna. Hinu trygg­inga­bréf­inu var þing­lýst á aðrar fast­eignir í hans eigu, meðal ann­ars umræddan sum­ar­bú­stað og jarðir.

Hluti af skuldauppgjöri Skúla við bankann

4. sept­em­ber síð­ast­lið­inn leysti Arion banki ein­býl­is­hús Skúla á Sel­tjarn­ar­nesi til sín vegna skuld­anna sem á því hvíldu eftir veð­setn­ing­una árið 2018.  Sá gjörn­ingur var hluti af skulda­upp­gjöri Skúla við bank­ann.

Jarð­irnar og sum­ar­bú­stað­inn í Hval­firði átti Skúli í gegnum félagið Kotasælu ehf.

Hinn 21. sept­em­ber 2018 var þing­lýst kvöðum á eign­irnar þess efnis að félag­inu væri hvorki heim­ilt að veð­setja eða selja eign­irnar nema fyrir lægi skrif­legt sam­þykki Arion banka. Þetta var gert vegna þess að Skúli veð­setti þessar eignir meðal ann­ars til að taka þátt í skulda­bréfa­út­boði WOW air þá um haustið. Bankinn veitti hins vegar Skúla heim­ild til að selja eign­irnar í sept­em­ber síð­ast­liðnum og er það einnig hluti af skulda­upp­gjöri Skúla.

Botnlaust tap hjá félögum Skúla

Félag Skúla, Kotasæla, er þá í miklum kröggum en tap félags­ins á síð­asta ári nam tæpri 271 milljón króna. Það er þó tals­vert minna en árið áður, 2018, en þá nam tapið tæpri 421 milljón króna. Tapið á síð­asta ári skýrist að lang­mestu leyti af afskriftum og virð­is­rýrnun en einu tekjur fyr­ir­tæk­is­ins voru húsa­leigu­tekjur upp á tæpar 12 millj­ónir króna. Eigið fé félags­ins í árs­lok var bók­fært rúmar 205 millj­ónir króna. Það segir hins vegar ekki alla sög­una vegna þess að félagið skuld­aði þá tengdum aðilum, Skúla sjálfum og öðrum félögum hans, 844 millj­ónir króna.

Þá tap­aði fjár­fest­ing­ar­fé­lagið Títan, móð­ur­fé­lag WOW air, tæp­lega 600 millj­ónum króna á síð­asta ári. Tapið má því sem næst ein­göngu rekja til nið­ur­færslu á kröfum félags­ins á hendur öðrum fél­göum í eigu Skúla, en hann er einnig einig eig­andi Títan. Eigið fé félags­ins var í árs­lok 2019 nei­kvætt um rúmar 637 millj­ónir króna.