Gærdagsþrautin, hér er hún.

***

Aukaspurning nr. 1:

Hvaða íslenski myndlistarmaður skyldi hafa málað málverkið hér að ofan?

***

Aðalspurningar:

1.   Rami Malek heitir bandarískur leikari af egifskum ættum sem sló í gegn í hlutverki Freddie Mercury í bíómynd um ævi söngvarans knáa. En Malek hefur líka vakið lukku í sjónvarpsþáttaröð vestanhafs þar sem hann leikur tölvumann, sem kemst í kynni við dularfull stjórnleysingjasamtök sem virðast skera upp herör gegn kapítalisma og eftirlitssamfélagi nútímans. Hvað heita þessir sjónvarpsþættir?

2.   Hvað heitir höfuðstaður Grænlands?

3.   Hvaða fyrrverandi ráðherra vann um daginn verðlaun fyrir spennusögu sem heitir Sykur?

4.   Hver lék aðalhlutverkið í kvikmyndinni Hvítur, hvítur dagur sem frumsýnd var í fyrra?

5.   Nöfn fjögurra af ríkjum Bandaríkjanna byrja á bókstafnum W. Nefnið að minnsta kosti tvö þeirra.

6.   Hvað hét sú persóna í sögunum um Múmínálfana sem var besti vinur Múmínsnáðans? Þessi persóna bar býsna stóran hatt og spilaði gjarnan á munnhörpu?

7.   Hvað fékk glataði sonurinn í matinn þegar hann sneri heim?

8.   Fáar konur voru í fremstu röð rússneskra kommúnista þegar þeir rændu völdum 1917 og settu Sovétríkin á stofn. Þeirra helst var líklega Nadezhda Konstantinovna Krupskaya. Þegar Jósef Stalín hóf síðar að ryðja úr vegi öllum gömlu kommúnistaforingjunum í hreinsunum miklu, þá dirfðist hann ekki að hrófla við Krupskayu. Hvers vegna ekki?

9.   Hvað þýðir Th-ið í nafni Guðna Th. Jóhannessonar forseta?

10.   Listahópur einn er til suður í Reykjavík. Fjöldi þeirra sem taka þátt á hverjum tíma mun vera örlítið á reiki, en það voru að sögn þær Þuríður Blær Jóhannsdóttir og Kolfinna Nikulásdóttir sem höfðu frumkvæði að því að kalla hópinn saman árið 2013. Hvað kallast hópurinn?

***

Aukaspurning nr. 2:

Hver er maðurinn til hægri sem aðeins sést hluti af?

***

Svör við aðalspurningum:

1.   Mr. Robot.

2.   Nuuk.

3.   Katrín Júlíusdóttir.

4.   Ingvar Sigurðsson.

5.   Washington, West Virginia, Wyoming og Wisconsin.

6.   Snúður.

7.   Kálfakjöt.

8.   Því hún var ekkja byltingarleiðtogans Leníns.

9.   Thorlacius.

10.  Reykjavíkurdætur.

***

Svör við aukaspurningum:

Númer 1: Íslenski málarinn er Helgi Þorgils Friðjónsson.

Númer 2: Maðurinn á Kínamúrnum er Richard Nixon þáverandi Bandaríkjaforseti í frægri Kínaheimsókn sinni árið 1972.

Hér til hliðar má einmitt sjá stærri hluta af þessari sömu mynd.

***

Og loks aftur gærdagsþrautin.