Klikkið hér og þá birtist – eins og fyrir töfra - þrautin frá í gær.

***

Fyrri aukaspurning.

Skýringamyndin hér að ofan sýnir eitt frægasta markið og glæsilegasta markið sem skorað hefur verið í lokakeppni HM í fótbolta karla. Þar endaði glæsileg uppbygging með því að bakvörðurinn Carlos Alberto skoraði með dúndurskoti. Hvaða ár var þetta mark skorað?

***

Aðalspurning:

1.   Í hvaða frægu kvikmynd er lokaniðurstaðan þessi: „Frankly, my dear, I don't give a damn.“

2.   Og hvað heitir persónan sem er ávörpuð sem „my dear“ í þessu tilfelli?

3.   Tígrisdýr og ljón eru stærstu núlifandi kattardýrin. Hvaða kattartegund er í þriðja sæti að stærð og þyngd?

4.   Hver var forsætisráðherra Breta þegar atkvæðagreiðslan um Brexit fór fram?

5.   Akkiles hét hetja ein í Grikklandi hinu forna, eða svo herma sögur að minnsta kosti. Móðir hans hafði búið svo um hnúta að hann varð eigi vopnbitinn nema á einum stað á kroppnum. Hvaða staður var það?

6.   Marius hét rómverskur pólitíkus og herforingi sem kom mjög við sögu í fyrstu umferð borgarastyrjaldanna í Róm á fyrstu öld fyrir Krist. Hann taldist fulltrúi alþýðunnar og átti í mikilli keppni við auðmann einn mikinn, sem fór að lokum með sigur af hólmi og varð einræðisherra um skeið. Hvað hét auðmaður þessi?

7.    „Black Widow“ eða „Svarta ekkjan“ heitir persóna ein sem birtist reglulega í amerískum ofurhetjumyndum þessi árin. Hver leikur hana?

8.   Hvað heitir fjörðurinn sem gengur inn úr Faxaflóa og nær í raun allt frá mynni Hvalfjarðar og að Reykjavík og Seltjarnarnesi?

9.   Linda Pétursdóttir alheimsfegurðardrottning 1988 fæddist á Húsavík en ólst að mestu upp á öðrum stað á landinu. Hvar var það?

10.   Hvað heitir formaður verkalýðsfélagsins VR?

***

Seinni aukaspurning:

Hvað heitir kvenpersónan sem sést á myndinni hér að neðan? Hún hefur oft verið túlkuð í bíói og sjónvarpi og sést hér í kvikmynd frá Disney-fyrirtækinu.

***

Svör við aðalspurningum:

1.   Á hverfanda hveli, eða Gone With the Wind.

2.   Scarlett O'Hara.

3.   Jagúar. Hlébarði er að sjálfsögðu ekki rétt, enda allt önnur tegund þótt hlébarðar og jagúarar séu líkir í útliti.

4.   Cameron.

5.   Hællinn.

6.   Sulla.

7.   Scarlett Johansen.

8.   Kollafjörður.

9.   Vopnafirði.

10.   Ragnar Þór Ingólfsson.

***

Svör við aukaspurningum:

Carlos Alberto skoraði sitt glæsilega mark árið 1970 í úrslitaleik HM í Mexíkó. Þetta var fjórða og síðasta markið í 4-1 sigri Brasilíumanna á Ítölum.

Á hlekknum hér að neðan má sjá hann spjalla um markið sitt:

Persónan er svo mærin Marían eða Maríanna sem Hrói höttur er einlægt svo skotinn í.

***

Og aptur er hér hlekkur á þrautina frá í gær.