Saganet - Útvarp Saga ehf., félagið sem rekur Útvarp Sögu, hagn­að­ist um tæpar tvær millj­ónir króna árið 2019 sam­kvæmt nýbirtum árseikn­ingi. Launa­kostn­aður dróst saman um 77 pró­sent frá fyrra ári.

Félagið heldur utan um rekstur útvarps­stöðv­ar­innar og er eini hlut­hafi þess útvarps­stjór­inn Arn­þrúður Karls­dóttir. Í árs­reikn­ingnum kemur fram að eitt árs­verk hafi verið hjá félag­inu og námu launa­greiðslur aðeins 2,4 millj­ónum króna. Er það mik­ill sam­dráttur frá árinu 2018 þegar launa­kostn­aður nam 10,5 millj­ónum króna.

Þá koma fram aðrar upp­lýs­ingar um rekst­ar­nið­ur­stöðu árs­ins 2018 en birtar höfðu verið í fyrri árs­reikn­ingi. Félagið hafði til­kynnt um 1,6 milljón króna hagnað árið 2018 og hafði einnig skilað hagn­aði tvö ár á undan. Var fjöl­mið­ill­inn þannig einn fárra einka­rek­inna miðla á Íslandi sem skilað hefur hagn­aði und­an­farin ár.

Í nýja árs­reikn­ingnum segir hins vegar að tap hafi orðið á rekstr­inum árið 2018. Kemur fram að tapið hafi numið 3,6 millj­ónum króna. Er það rúm­lega 5 milljón króna verri nið­ur­staða en áður kom fram. Í eldri árs­reikn­ingnum kemur raunar fram að launa­kostn­aður hafi verið enn hærri það árið en nú er sagt, 14,7 millj­ónir, en upp­hæðir vegna vöru­notk­unar og ann­ars rekst­ar­kostn­aðar hins vegar mun lægri.

Ekki kemur fram í nýja árs­reikn­ingnum hvað veldur þessu mis­ræmi, en félagið hefur áður leið­rétt rekst­ar­nið­ur­stöðu fyrra árs með þessum hætti. Í árs­reikn­ingi vegna árs­ins 2017 var nið­ur­staða árs­ins 2016 leið­rétt vegna mis­taka í bók­haldi.

Lilja Alfreðs­dóttir, mennta- og menn­ing­ar­mála­ráð­herra, úthlut­aði Útvarpi Sögu nýverið 5.250.398 krónum í sér­stakan rekst­ar­stuðn­ing við einka­rekna fjöl­miðla. Alls fengu 23 fjöl­miðlar slíkan stuðn­ing.