„Eftir á að hyggja voru það mistök af minni hálfu að þiggja þetta boð um flugferðina. Við sem gegnum ábyrgðarstöðum á vegum ríkisins og þá ekki síst ráðherrar verðum að ganga á undan með góðu fordæmi.“

Þetta segir Áslaug Arna Sigurbjörnsdóttir dómsmálaráðherra í svari við fyrirspurn Stundarinnar. Stundin greindi frá því á mánudag að þyrla Landhelgisgæslunnar hefði flutt Áslaugu Örnu úr hestaferð sem hún var í með föður sínum á fundinn „Að lifa með veirunni“ í Reykjavík og til baka fimmtudaginn 20. ágúst. Ráðherra var ekki meðal ræðumanna á fundinum, en hlýddi á ræður og yfirgaf fundinn þegar hann var rétt um hálfnaður. Fundinum var streymt á netinu. Flogið var með hana til baka í hestaferðina og fór þyrlan þaðan í Borgarfjörð í næsta verkefni.

Sjaldgæft er að Landhelgisgæslan fljúgi með ráðherra og þegar það gerist tengist það oftast störfum stofnunarinnar eða utanríkismálum, svo sem heimsóknum erlendra ráðamanna eða varnaræfingum. Segir Áslaug Arna að Georg Lárusson, forstjóri Landhelgisgæslunnar, hafi boðið henni farið í samtali sem þau áttu af öðru tilefni.

„Mér var tjáð að það hefði ekki áhrif á önnur verkefni þyrlunnar, kostnað eða flugáætlun“

„Eins og áður hefur komið fram var mér boðið af forstjóra Landhelgisgæslunnar að slást með í för þyrlu stofnunarinnar sem var í verkefnum þennan dag,“ segir Áslaug Arna. „Þetta kom upp í samtali sem við áttum af öðru tilefni daginn áður. Ég þáði boðið þar sem mér var tjáð að það hefði ekki áhrif á önnur verkefni þyrlunnar, kostnað eða flugáætlun.

Ég taldi mikilvægt að sýna málefninu stuðning í verki með því að mæta á fundinn „Að lifa með veirunni“ enda var efnt til hans að tillögu sóttvarnalæknis og almannavarnardeildar ríkislögreglustjóra. Markmiðið er mikilvægt þ.e.a.s. að skapa vettvang fyrir aukið samráð í baráttunni við þann vágest sem veiran er.“

Spurningar Stundarinnar og svör ráðherra

1. Af hverju sótti ráðherra fundinn „Að lifa með veirunni“ fimmtudagsmorguninn 20. ágúst frekar en til dæmis að fylgjast með honum netleiðis?

Líkt og að framan segir taldi ég mikilvægt að mæta sjálf til að undirstrika mikilvægi tilefnisins.

2. Var eitthvað annað tilefni með ferð ráðherra til Reykjavíkur? 

Nei.

3. Óskaði ráðherra eftir fluginu sjálf?

Forstjóri Landhelgisgæslunnar bauð upp á þessa flugferð í samtali sem við áttum af öðru tilefni daginn áður. 

4. Hvenær var tekin ákvörðun um að ráðherra færi á fundinn og hvenær var tekin ákvörðun um að ferðin yrði farin með þyrlunni?

Ég taldi rétt að vera á staðnum og boð um að fara með þyrlunni kom daginn áður.

5. Telur ráðherra það rétta nýtingu á tíma, mannauð og fjármunum Landhelgisgæslunnar að flytja ráðherra á þennan fund?

Eins og hefur komið fram í tilkynningu frá Landhelgisgæslunni var að hennar mati ekki um að ræða aukakostnað né aukna fyrirhöfn eða skerta viðbragðsgetu þar sem þyrlan var fullmönnuð til útkalls. 

6. Telur ráðherra það rétta nýtingu á tíma, mannauð og fjármunum Landhelgisgæslunnar að flytja ráðherra í frí?

Vísa í svar við spurningu nr. 5.