Rík­is­stjórn Íslands hefur ekki rætt um einn mann­skæð­asta bruna síð­ustu ára­tuga á þeim tveimur rík­is­stjórn­ar­fundum sem haldnir hafa verið síðan.

Þrír lét­ust og tveir til við­bótar voru fluttir á gjör­gæslu­deild þegar eldur kom upp í þriggja hæða húsi við Bræðra­borg­ar­stíg á fimmtu­dag í síð­ustu viku. Talið er að um íkveikju hafi verið að ræða, en 73 eru skráðir til heim­ilis í hús­inu og líkur eru á því að þar sé um erlent verka­fólk að ræða og að atvinnu­rek­endur þeirra hafi útvegað þar hús­næði. Húsið er í eigu félags­ins HD verk ehf.

Jón Við­ar Matth­ías­son, slökkvi­liðs­stjóri á höf­uð­borg­ar­svæð­inu, hefur sagt brun­ann einn þann mann­skæð­asta sem hefur átt sér stað á Íslandi síð­ust þrjá­tíu til fjöru­tíu ár. Sagði hann málið eitt erf­ið­asta verk­efni sem hann hafi upp­lifað á ferli sínum og fékk starfs­fólk sem tók þátt í aðstoð á vett­vangi félags­stuðn­ing vegna áfalls­ins.

Tveir rík­is­stjórn­ar­fundir hafa verið haldnir eftir að elds­voð­inn átti sér stað, föstu­dag­inn 26. júní og í dag 3. júlí. Bruninn eða mál tengd honum hafa ekki verið á dag­skrá. Engin frétt hefur birst um málið á vef stjórn­ar­ráðs­ins.

Til sam­an­burðar var á fundi rík­is­stjórnar í dag til umræðu fjár­þörf vegna snjó­flóða sem féllu á Flateyri í jan­úar. Eftir snjó­flóðin flugu þrír ráð­herrar rík­is­stjórn­ar­innar, þau Katrín Jak­obs­dóttir for­sæt­is­ráð­herra, Bjarni Bene­dikts­son fjár­mála­ráð­herra og Sigurður Ingi Jóhanns­son, sam­göngu- og sveit­ar­stjórn­ar­ráð­herra, til Flat­eyrar og kynntu sér aðstæður. Rík­is­stjórnin ræddi málið á fyrsta fundi sínum eftir atvikið, tveimur dögum eftir að snjó­flóðin féllu. Var þá stofn­aður starfs­hópur til að fara yfir ofan­flóða­varnir, verk­efn­is­stjórn í kjöl­farið til að fylgja til­lögum hans eftir og úthlut­aði rík­is­stjórnin fjár­munum til þessa. Mikið eigna­tjón varð í snjó­flóð­unum, en eng­inn lét lífið.

Elds­voð­inn á Bræðra­borg­ar­stígVerka­lýðs­fé­lög hafa kallað eftir rann­sókn á brun­anum og aðstæðum erlends verka­fólks.

Mynd: Hlynur Helgi Hall­gríms­son

Bruninn hefur vakið óhug og skapað umræðu um aðbúnað erlends verka­fólks á Íslandi og bruna­varnir í ósam­þykktum gisti­stöðum og atvinnu­hús­næði. Alþýðu­sam­band Íslands (ASÍ) hefur kallað eftir því að ítar­leg rann­sókn fari fram á aðdrag­anda og orsökum brun­ans. Þá voru tvö þeirra sem lét­ust félags­menn í Eflingu og hefur félagið sett brun­ann í sam­hengi við aðbúnað erlends verka­fólks á Íslandi. „Efling krefst þess að félags­mála­ráð­herra og rík­is­stjórnin efni taf­ar­laust lof­orð um hertar aðgerðir gegn brota­starf­semi á vinnu­mark­aði, þar með talið lof­orð um sekt­ar­heim­ildir vegna kjara­samn­ings­brota og önnur við­ur­lög,“ sagði í yfir­lýs­ingu frá félag­inu.