Ólafur William Hand, sem áður var upplýsinga- og markaðsfulltrúi Eimskipa, hefur verið sýknaður í Landsrétti en áður hafði hann verið sakfelldur í héraði fyrir alvarlegt ofbeldi gagnvart barnsmóður sinni. Í matsgerð dómskvadds matsmanns er laut að áverkum barnsmóður Ólafs kemur fram að lýsingar hennar og sambýlismanns hennar á atburðum rými illa við áverka á konunni. Einkum þess vegna var Ólafur sýknaður.

Sumarið 2016 kom barnsmóðir Ólafs ásamt sambýlismanni sínum að heimili Ólafs og eiginkonu hans í þeim tilgangi að sækja barn þeirra Ólafs en til stóð að barnsmóðirin færi með barnið til útlanda. Munu hafa komið upp deilur um hvenær barnið skyldi fara með móður sinni sem enduðu með því að hún ruddi sér leið inn á heimili Ólafs og tók barnið með sér. Mun hafa komið til átaka inni á heimilinu en bar þeim Ólafi og barnsmóður hans ekki saman um hvað hefði gerst. Hún sakaði Ólaf um að hafa tekið sig hálstaki, hrint henni, ýtt henni upp að vegg og rifið í hár hennar.

Í Héraðsdómi Reykjavíkur var Ólafur dæmdur í tveggja mánaða skilorðsbundið fangelsi fyrir að hafa tekið barnsmóður sína hálstaki, þrengt ítrekað að hálsi hennar og hrint henni þannig að hún féll í gólfið. Gögn og myndir af bráðamóttöku Landspítala hafi sýnt marga yfirborðsáverka á hálsi, tognun og ofreynslu á hálshrygg, yfirborðsáverka á bakvegg og brjóstkassa.

Landsréttur hefur hins vegar snúið dóminum við. Í niðurstöðu dómstólsins kemur fram að fyrir liggi að konan hafi farið órboðin inn á heimili Ólafs og haft barn þeirra á brott með sér skömmu síðar. Hvað varði atvik þar inni standi orð gegn orði, orð Ólafs og eiginkonu hans gegn orðum barnsmóður Ólafs og sambýlismanns hennar.

Í matsgerð dómskvadds matsmanns, bæklunarskurðlæknis, kom fram að gögn og lýsingar rímuðu illa við þá staðhæfingu að Ólafur hefði tekið barnsmóður sína hálstaki. Þá hafi verið ósamræmi í framburði sambýlismanns barnsmóðurinnar um atvik. Ólafur hafi hins vegar staðfastlega neitað sök og sé framburður hans í góðu samræmi við framburð eiginkonu hans. Var hann því sýknaður í málinu.