Olíufélagið Skeljungur byrjaði að nýta hlutabótaleiðina svokölluðu sex dögum eftir að hafa greitt út 600 milljóna króna arð til hluthafa félagsins í byrjun apríl. Þetta kemur fram í svörum frá forstjóra Skeljungs, Árni Pétri Jónssyni.

Hann undirstrikar að ákvörðunin að greiða út arðinn hafi verið tekin í febrúar, áður en COVID-faraldurinn skall á, og að úrræðið hafi ekki verið nýtt fyrir mjög marga starfsmenn. Þannig hafi launagreiðslurnar frá íslenska ríkinu til starfsmannanna numið 6 til 7 milljónum króna í apríl.

„Okkur reiknast til að „hlutabótagreiðslur“ sem starfsmenn Skeljungs fengu vegna aprílmánaðar hafi numið um 6 til 7 milljónir króna,“ segir Árni Pétur. 

Þessi upphæð nemur um 1 prósenti af arðgreiðslunni sem hluthafar félagsins fengu greidda í apríl.

Árni Pétur segir ennfremur að allir hluthafar Skeljungs hafi verið hlynntir arðgreiðslunni: „Tillögu um arðgreiðslu þarf að leggja fram þremur vikum fyrir aðalfund og var hún því lögð fram í febrúar, það er áður en áhrifa Covid-19 gætti.  Tillagan hljóðaði upp á 600 milljóna króna arðgreiðslu sem greiða skyldi út 2. apríl. Á aðalfundi Skeljungs þann 5. mars var tillagan samþykkt með öllum greiddum atkvæðum. Þann 2. apríl uppfylltum við samþykkt aðalfundar með því að greiða arðinn,“ segir í skriflegu svari hans. 

Stundin greindi frá arðgreiðslunni út úr Skeljungi í gær og byggði á árshlutauppgjöri olíufélagsins sem félagið birti opinberlega. Félagið er skráð í Kauphöll Íslands og þarf þar af leiðandi að birta ítarlegar upplýsingar um rekstur sinn á hverjum ársfjórðungi. Stundin hafði spurt Árna Pétur um arðgreiðsluna og ætlaða notkun á hlutabótaleiðinni á mánudaginn var. Forstjórinn vildi bíða með svör sín þar til eftir Skeljungur kynnti árshlutauppgjör sitt. 

Hlutabótaleiðin var lögfest til að gagnast fyrirtækjum sem urðu fyrir tekjufalli vegna COVID-19. Ekki er horft á þætti eins og eiginfjárstöðu þegar metið er hvort ríkið eigi að greiða hluta launa starfsmanna sem fá hlutabætur. Horft er á samdrátt í tekjum. Þannig hefur til að mynda verið gagnrýnt að Bláa lónið hafi nýtt sér úrræðið eitt fyrst íslenskra fyrirtækja þrátt fyrir að vera fjársterkt. 

Árni Pétur: Gert samkvæmt tilmælum stjórnvalda

Árni Pétur segir að laun helstu stjórnenda félagsins hafi sömuleiðis verið lækkuð um 25 til 30 prósent í byrjun apríl áður en arðurinn var greiddur út og áður en Skeljungur hóf að nýta hlutabótaleiðina. 

Forstjórinn segir að Skeljungur hafi valið að fara hlutabótaleiðina samkvæmt tilmælum stjórnvalda og til að reyna að verja störf hjá félaginu „8. apríl var vinnuframlag rúmlega helmings starfsmanna Skeljungs skert.   Þannig var farið að tilmælum stjórnvalda um að reyna eftir fremsta megni að halda ráðningasambandi við starfsmenn okkar í stað þess að fara í uppsagnir.  Með það að leiðarljósi þá forðuðumst við uppsagnir eins og við gátum og skertum frekar vinnuframlag starfsmanna.“

„Ekki er gert ráð fyrir því að fólk verði í skertri vinnu í júní“

Hann segir að það sé í stöðugri endurskoðun hvernig Skeljungur hagar vinnuframlagi starfsmanna á þessum óvissutímum vegna COVID-19 og að félagið muni draga úr skertu starfshlutfalli þeirra sem fóru á hlutabætur nú í maí.  „Þetta er í stöðugri endurskoðun hjá okkur og gerum við ráð fyrir að draga úr skerðingunni núna í maí og ekki er gert ráð fyrir því að fólk verði í skertri vinnu í júní,“ segir forstjórinn.

30 milljóna arðgreiðsla365, félag Ingibjargar Pálmadóttur, fékk tæplega 30 milljóna króna arð frá Skeljungi í byrjun apríl. Eiginmaður Ingibjargar, fjárfestirinn Jón Ásgeir Jóhannesson, er stjórnarformaður Skeljungs.

Mynd: Pressphotos

Engar uppsagnir

Árni Pétur segir að Skeljungur hafi ekki þurft að fara í neinar uppsagnir út COVID-faraldrinum: „Nei, hingað til hefur ekki verið farið í uppsagnir hjá Skeljungi vegna Covid-19.“

Enn fremur segir hann að Skeljungur hafi gripið til hagræðingaraðgerða upp á 200 milljónir króna fyrir tímabilið apríl til desember: Notkunn á hlutabótaleiðinni er því hluti af þeim aðgerðum. Hann segir stöðuna óljósa, eins og gefur að skilja, en að Skeljungur muni gera hvað félagið getur til að verjast högginu af COVID-19: „Félagið hefur gripið til margvíslegra hagræðingaaðgerða sem að stærstum hluta snúast um almennt kostnaðaraðhald.  Við höfum kynnt að áhrif aðhaldsaðgerða okkar muni lækka kostnað upp á rúmar 200 milljónir króna fyrir tímabilið apríl til desember  2020. Ljóst er að ákveðnir tekjupóstar, s.s. millilandaflug, þjónusta við skemmtiferðaskip, umferð bílaleigubíla og rútur, munu taka á sig mikið högg. Þá hefur þróun gjaldmiðla og mikil lækkun á heimsmarkaðsverði eldsneytis reynst félaginu erfið. Mikil óvissa ríkir um það hvernig næstu mánuðir munu þróast en við fylgjumst grant með gangi máli eins og önnur fyrirtæki.“