Forstjóri Icelandair: „Við verðum að geta farið að fljúga aftur í sumar“

Icelandair þolir að vera tekju­laust í ein­hverja mán­uði og fram á sumar en þá verði að vera hægt að fara að fljúga aftur, eigi fyr­ir­tækið að lifa af. Þetta segir Bogi Nils Bogason, for­stjóri Icelandair, í sam­tali við Stundina. Icelandair sendi í morgun frá sér til­kynn­ingu um að 240 starfs­mönnum yrði sagt upp störfum og að 92% starfs­manna þar myndu taka á sig skert starfs­hlut­fall.  

Bogi segir að hluti þeirra 92 pró­senta starfs­manna sem farið verði fram á að taka á sig skert starfs­hlut­fall muni njóta úrræðis rík­is­stjórn­ar­innar um mót­fram­lag vegna slíkrar skerð­ingar. Það eigi til að mynda við um flug­þjóna og flug­liða, en eigi hins vegar ekki við um alla starfs­menn, til að mynda eigi það ekki við um flug­menn sem sumir hverjir hafi verið beðnir um að taka sér launa­laust leyfi.

„Í venju­legu ári koma mjög margir áhafn­ar­með­limir inn yfir sum­ar­tím­ann, bæði flug­liðar og flug­menn. Þar var búið að skera mjög mikið niður í þeim hópi áður en þessar aðgerðir núna áttu sér stað og verður enn frekar nú. Flug­freyjur eru að fara í hluta­störf, og flug­liðar, eða það var það sem var óskað eftir af okkar hálfu og það þurfa auð­vitað allir að sam­þykkja það. Það er síðan óskað eftir því að flug­menn hjá fyr­ir­tæk­inu taki á sig fimm­tíu pró­senta launa­skerð­ingu næstu tvo mán­uði. Varðandi upp­sagn­irnar þá eru þær bara víðs vegar í fyr­ir­tæk­inu, í raun á öllum sviðum,“ segir Bogi.

„Stjórn­endur munu allir taka á sig launa­skerð­ingu“ 

Bogi segir jafn­framt að allir muni taka á sig launa­lækk­anir innan félags­ins, stjórn­endur jafnt sem aðrir. Það sé þó mis­jafnt hvernig það verði útfært. Óskað verður eftir því að 92 pró­sent starfs­manna annað hvort lækki laun sín um 50 pró­sent, eins og til dæmis flug­menn í tvo mán­uði og munu þeir því ekki njóta hluta­starfa­úr­ræða rík­is­stjórn­ar­innar, og hins vegar muni aðrir starfs­menn fara í hluta­störf. „Stjórn­endur munu allir taka á sig launa­skerð­ingu þrátt fyrir mikið álag á ýmsum sviðum, það eru allir að taka á sig eitt­hvað.“

Bogi segir að aðgerðir þær sem rík­is­stjórnin hefur kynnt til aðstoðar atvinnu­líf­inu séu góð byrjun. „Við munum nýta okkur allt sem þar er. Við erum í mjög góðu sam­bandi við yfir­völd, við erum kerf­is­lega mik­il­vægt fyr­ir­tæki og því er mik­il­vægt að vera í góðum sam­skiptum.“