Máli Atla Jason­ar­sonar, sem lýsti því að hann hefði orðið fyrir ofbeldi af hálfu lög­reglu­manns algjör­lega að ástæðu­lausu, hefur verið vísað til hér­aðs­sak­sókn­ara til með­ferðar. Nefnd um eft­ir­lit með lög­reglu tók ákvörðun þar um 24. jan­úar síð­ast­lið­inn.  Þá voru liðnir 198 dagar frá því að Atli sendi nefnd­inni kvörtun sína og 149 dagar frá því nefndin hafði fengið til sín öll gögn í mál­inu. Ekki var kveikt á mynd­bands­upp­töku inni í lög­reglu­bílnum sem Atli var færður í.

Atli lýsti því í við­tali í Stund­inni 8. jan­úar síð­ast­lið­inn hverni hann hefði í júlí á síð­asta ári komið að konu sem lá með­vit­und­ar­laus í Aust­ur­stræti. Hann hafi þá hringt á Neyð­ar­lín­una sem hafi brugð­ist við með því að senda lög­reglu á stað­inn. Atli hafi rætt við tvo lög­reglu­þjóna þegar þeir komu á stað­inn, í mestu róleg­heitum að því er hann taldi, en þá hafi komið að þriðji lög­reglu­mað­ur­inn sem hafi ýtt við honum, sagt hann vera að trufla störf lög­regl­unnar og skipað honum að segja til nafns. Þegar Atli hafi neitað að gefa upp nafn, sem hann segir að hafi verið mis­tök sem rekja megi til þess hversu gátt­aður hann hafi verið á fram­kom­unni, hafi hann verið hand­tek­inn, hand­járn­aður og honum ýtt inn í lög­reglu­bíl.

Segist hafa verið laminn í andlitið

Atli lýsti því að óþægi­legt hafi verið að sitja með hendur hand­járn­aðar bak við bak og því hafi hann hallað sér eilítið til hliðar í bílnum. „Það voru ein­hver heimsku­leg­ustu mis­tök ævi minnar. And­ar­taki síðar fékk ég oln­boga lög­reglu­manns­ins í and­litið. Hann öskr­aði á mig að ég skyldi ekki reyna að flýja og að ég skyldi horfa út um glugg­ann. Viðbrögð mín við þessu voru einnig afar heimsku­leg, því ég horfði ekki út um réttan glugga, ég horfði út um gluggan hans meg­inn. Aftur fékk ég oln­boga í and­litið — í þetta skiptið fastar en áður og lög­reglu­mað­ur­inn lagð­ist ofan á mig með til­heyr­andi öskrum. Ef ég á að reyna að skýra hvað gerð­ist hlýtur hann að hafa haldið að ég væri að ögra honum en það var ég alls ekki að gera. Ég verð að við­ur­kenna að ég man ekki nákvæm­lega hvað það var sem hann sagði en það tengd­ist því eitt­hvað að ég skyldi hlýða honum. Meðan á þessu stóð heyrð­ist ekk­ert í lög­reglu­þjón­inum sem ók bílnum,“ sagði Atli í fyrr­nefndu við­tali.

„Það er fárán­legt að manni sé gert að bíða svona lengi“

Atli var færður í fanga­klefa við kom­una upp á lög­reglu­stöð þar sem hann beið í um það bil tíu mín­útur þar til hann var færður til skýrslu­töku. Að henni lok­inni hafi honum verið sleppt. Hann hafi farið og fengið áverka­vott­orð dag­inn eftir og síðan lagt fram kvörtun 11. júlí vegna fram­kom­unnar. Í sam­tali við Stundina 8. jan­úar síð­ast­lið­inn velti Atli því fyrir sér hvernig á því stæði að hann hefði engin svör fengið við kvörtun sinni allan þennan tíma. „Með hverjum deg­inum sem líður þykir mér þetta fárán­legra. Mér hefur liðið verr og verr yfir þessu og þetta er að angra mig. Þetta er tvennt, ann­ars vegar að hafa verið lam­inn af lög­regl­unni og hins vegar að fá engin svör. Er þetta í lagi? Má þetta kannski bara? Má lög­reglan kannski bara gera fólki upp sakir og lemja það síðan inni í lög­reglu­bíl?“

Furðulegt að myndbandsupptaka sé ekki sjálfvirk

Atli segir að niðu­staðan hafi komið honum ánægju­lega á óvart. „Allir sem ég hafði talað við höfðu sagt við mig að búast ekki við neinu frá nefnd­inni. Þess vegna fór þetta fram úr mínum vonum. Ég get ekki kvartað undan sam­skiptum mínum við nefnd­ina en tíma­lengdin á afgreiðslu máls­ins er auð­vitað fárán­leg. Það er fárán­legt að manni sé gert að bíða svona lengi. Það er áhuga­vert að velta fyrir sér að eftir að hafa beðið í hálft ár líður bara hálfur mán­uður frá því ég ræði við fjöl­miðla um málið og þar til loks­ins nið­ur­staða fæst.“ Í reglum um störf nefnd­ar­innar segir að hún skuli að jafn­aði ljúka afgreiðslu mála á innan við mán­uði. 

„Það veitir manni ekki mikla örygg­is­til­finn­ingu að ekki sé verið að taka allt upp“

Í ákvörðun nefndar um eft­ir­lit lög­reglu kemur fram að nefndin hafi farið yfir fyr­ir­liggj­andi gögn í mál­inu, lög­reglu­skýrslur og upp­tökur. Nefndin býr ekki yfir mynd­bands­upp­tökum sem varpað gætu frek­ari ljósi á máls­at­vik eins og þeim er lýst í erindi Atla,“ segir í ákvörð­un­inni. Í gær birti Atli eft­ir­far­andi tvít: „Ég fékk þær upp­lýs­ingar í morgun, á fundi á lög­reglu­stöð­inni, að það kæmi fyrir að lög­reglu­þjónar gleymdu að kveikja á mynd­bands­upp­töku við hand­töku. Mikið er nú heppi­legt að vera gleym­inn, þegar maður ætlar að beita ofbeldi, ekki satt?“

Í sam­tali við Stundina fyrr í dag segir Atli að hann vilji ekki full­yrða að lög­reglu­þjón­arnir hafi sleppt því að kveikja á vél­inni vilj­andi. „Ég myndi ekki þora að full­yrða það en hins vegar finnst mér furðu­legt að kerfið sé ekki þannig að það kvikni sjálf­krafa á mynda­vélum í þessum aðstæðum. Það veitir manni ekki mikla örygg­is­til­finn­ingu að ekki sé verið að taka allt upp.“