Maður sem var í október síðastliðnum dæmdur í 7 ára fangelsi í Héraðsdómi Reykjavíkur fyrir endurtekin kynferðisbrot gegn þá barnungum syni sínum, var meðal foreldra í skólabúðunum að Reykjum á síðasta ári. Í búðunum í fyrra slóst maðurinn í för með öðrum syni sínum, sem er ólögráða og enn í forsjá mannsins.
Í skólabúðunum að Reykjum í Hrútafirði dvelja börn í 7. bekk hvaðanæva að af landinu um fimm daga skeið. Þegar maðurinn dvaldi þar, ásamt öðrum foreldrum, sætti hann lögreglurannsókn vegna brota sinna gegn eldri syni sínum, sem nú er fullorðinn. Framdi hann brotin á árunum 1996 til 2003, þegar sonurinn var á aldrinum 4–11 ára. Samkvæmt dómnum braut maðurinn gegn trausti og trúnaði sonar síns, þar sem hann nauðgaði honum í fjölda skipta í endaþarm og káfaði í fjölda skipta á kynfærum hans, auk þess að láta son sinn sömuleiðis káfa á kynfærum sínum.
Athugasemdir