Rafmagn hefur farið af bæði á Norð­ur­landi vestra og Norð­ur­landi eystra. Meðal ann­ars fór raf­magn af fyrir skömmu í Blöndu­hlíð í Skaga­firði en kom fljótt inn aftur. Hins vegar fór raf­magn af á Sauð­ár­króki og er raf­magns­laust þar og í nær­sveitum. Hið sama má segja um Grýt­bakka­hrepp við Eyja­fjörð þar sem raf­magn fór af um eitt­leytið en sló inn aftur skömmu síðar. Rafmagn fór einnig af í Svar­vað­ar­dal í Eyja­firði  og raf­magns­laust er á Dalvík. Þá er einnig raf­magns­laust á Húsavík.

Bilun er í dreif­ingu raf­magns á Reykja­strönd í Skaga­firði og unnið er að því að finna orsakir bil­un­ar­innar. Þá er raf­magns­bilun í Öxar­firði og unnið að leit að bilun. Staurar eru brotnir í Kópa­skerslínu.

RARIK er í við­brags­stöðu vegna raf­magns­trufl­ana og mun bregð­ast við bil­unum. Mælt er með því að slökkt sé á raf­tækjum þegar raf­magni slær út til að koma í veg fyrir tjón þegar það slær inn að nýju. Á þetta meðal ann­ars við um sjón­vörp og tölvur en einnig elda­vélar og fleiri tæki. Þá er ekki ráð­lagt að setja í þvotta­vél á meðan raf­magns­af­hend­ing er ótrygg.

Á norð­an­verðum Vest­fjörðum er ein­göngu keyrt á vara­afli frá Bol­ung­ar­vík sem fram­leitt er með dísel­vélum í vara­afl­stöð­inni þar. Landsnet tók ákvörðun um að rjúfa straum til að koma í veg fyrir raf­magns­leysi og tjón sem gæti orðið í óveðr­inu.