Starfsmenn á vegum Reykjavíkurborgar hafa í morgun reynt að forða því að jólakötturinn á Lækjartorgi fjúki í yfirvofandi óveðri sem nú nálgast hraðbyri höfuðborgarsvæðið.
Jólakötturinn var rétt í þessu bundinn við steypuklump. Starfsmennirnir, sem Stundin ræddi við, sögðust telja að nú fyki annað áður en jólakötturinn færi af stað.
Búið er að taka Oslóartréð niður og leggja það á Austurvöll til að verja það foktjóni. Þá er búið að fjarlægja stóru bjöllurnar sem hanga víða sem jólaskraut yfir götur miðborgarinnar. Þverböndin eru hins vegar látin vera enda ekki talið að þau geti farið af stað. „Það er unnið að því að huga að hlutum sem gæti hugsanlega farið af stað í svona veðri. Veðurfræðingarnir segja að veðrið verði hvað verst, á höfuðborgarsvæðinu það er að segja, í Vestubæ og Miðborginni. Það er því ekki vanþörf á,“ segir Bjarni Brynjólfsson, upplýsingafulltrúi Reykjavíkurborgar, í samtali við Stundina.
Starfsfólk hverfisstöðva borgarinnar er því á þönum nú og verður næstu klukkutíma, til að hefta hluti og fergja og reyna með því að koma í veg fyrir hugsanlegt tjón. Þegar að líður á daginn verður starfsfólk kallað í hús og ekki á ferli að nauðsynjalausu en í viðbragðsstöðu. Ákveðnir, velútbúnir hópar starfsmanna geta brugðist við ef í þá verður kallað, til að mynda ef tekur að flæða vegna stíflaðra niðurfalla eða ef eignir borgarinnar eru í hættu vegna veðurhamsins.
„Annars er fólki bara ráðlagt að vera ekki út eftir klukkan þrjú og við mælumst einnig til þess. Björgunarsveitir og viðbragðsaðilar verða við störf og best er ef hægt er að veita þeim greiða leið til björgunarstarfa, til dæmis með því að fólk sé ekki á bílum á götunum,“ segir Bjarni.
Óveðrið er skollið á Vestfjörðum, Norðvesturlandi og Norðausturlandi. Í Bolungarvík fyrir vestan eru norðaustan 20 metrar á sekúndu og snjókoma, á Raufarhöfn eru 22 metrar á sekúndu og rigning og gefin hefur verið út rauð viðvörun í fyrsta sinn á Ströndum og Norðurlandi vestra. Hluti ástæðunnar fyrir rauðri viðvörun er að ölduhæð verður mikil.
Óveðrið færist suður og austur með landinu í dag. Gult ástand tekur við á höfuðborgarsvæðinu með ört vaxandi norðanátt, 18 til 23 metrum á sekúndu í vesturhverfum.
Klukkan þrjú tekur við appelsínugult ástand, með norðan stormi eða roki, 20-28 metrum á sekúndu. Hvassast verður vestantil í borginni, á Kjalarnesi og Mosfellsbæ. Í tilkynningu frá Veðurstofu Íslands er áhættunni lýst: „Samgöngutruflanir eru líklegar á meðan veðrið gengur yfir og truflanir á flugsamgöngum. Hætt er við foktjóni og eru byggingaraðilar hvattir til að ganga vel frá framkvæmdasvæðum. Búast má við hækkandi sjávarstöðu vegna áhlaðanda og líkur á að smábátar geta laskast eða losnað frá bryggju. Fólki er bent á að ganga vel frá lausum munum og sýna varkárni.“ Appelsínugult ástand gildir til klukkan 7 í fyrramálið í höfuðborginni, en nær yfir allt land fram að aðfararnótt fimmtudags.
Athugasemdir