Forstjóri Polar Seafood styður frásögn Gunnþórs

Gunnþór Ingvason, fram­kvæmda­stjóri Síld­ar­vinnsl­unnar í Nes­kaup­stað, neitar því að til hafi staðið að blekkja menn á Græn­landi til að öðl­ast vel­vild þeirra og kom­ast þannig yfir veiði­heim­ildir. Vill Gunnþór meina að snúið hafi verið út úr tölvu­pósti sem hann sendi á starfs­menn Samherja í Namibíu, þar sem hann óskaði eftir punktum um hvernig unnið hefði verið að slíku í Afríku.

„Sælir félagar

Þannig er mál með vexti að vinir okkar í Græn­landi Henrik Leth, var að biðja mig að setja niður fyrir sig hvað þyrfti til í fjár­fest­ingum, veiðum, vinnslu og hafn­ar­mann­virkjum ef menn myndu vera setja upp fiski­mjöls og upp­sjáv­ar­verk­smiðju í Amma­salik aust­ur­strönd Græn­lands.

Hann er ekki að hugsa um að setja neitt upp, heldur eru ein­hverjir heima­menn í Græn­landi með ein­hverja með sér í því að reyna ná kvótum og goodwill af stjórn­völdum með því að þykj­ast vera fara byggja upp á austur græn­landi.

Eigið þið ekki til­búna ein­hverja svona punkta þó svo að þeir eigi við um afr­íku.“

Gunnþór neita ávirðingum

Þannig hljómar umræddur tölvu­póstur sem Gunnþór sendi á Aðal­stein Helgason, sem í upp­hafi var fram­kvæmda­stjóri Namib­íu­út­gerðar Samherja, Jóhannes Stef­áns­son, þáver­andi fram­kvæmda­stjóra Arcticnam Fishing í Namibíu sem síðan hefur ljóstrað upp um fram­ferði Samherja, og til Sigurðar Ólasonar, fram­kvæmda­stjóra við­skipta­þró­unar hjá Samherja. Frétta­blaðið greindi frá þessum tölvu­póst­inum í morgun og sagði hann sýna fram á að blekkja hefði átt græn­lensk stjórn­völd til að útvega kvóta.  

Haft er eftir Gunnþóri á mbl.is að ekki hafi staðið til að blekkja neinn og það hafi ekki verið Síld­ar­vinnslan né Polar Seafood, sem Henrik Leth stýrir, sem hafi haft uppi hug­myndir um að ná kvóta eða vel­vild af stjórn­völdum með því að þykj­ast vera að fara að byggja upp á Austur Græn­landi, heldur væru það heima­menn sem það hefðu ætlað sér.

„Ég þekki allt á Græn­landi, það hefði frekar átt að vera öfugt“

Henrik Leth styður þessa frá­sögn Gunnþórs í sam­tali við Stundina. Hann hafi rætt við Gunnþór árið 2014 um hvort mögu­legt væri að byggja upp land­vinnslu á Austur-Græn­landi, einmitt vegna þess að þeim hafi borist til eyrna að ákveðnir aðilar hefðu lýst áformum um að slíka upp­bygg­ingu. Könnun á fýsi­leika þess hefði leitt til þess, segir Leth, að ekki hefðu verið talið að það væri hag­kvæmt fyrir East Greenland Codfish, græn­lenska sjáv­ar­út­vegs­fyr­ir­tækið sem Síld­ar­vinnslan og Polar Seafood áttu saman á þeim tíma, að byggja slíkt upp.

Leth sagði jafn­framt fjar­stæðu­kennt að hann hefði beðið Gunnþór um ráð til að koma sér vel við Græn­lend­inga. „Ég þekki allt á Græn­landi, það hefði frekar átt að vera öfugt,“ sagði Leth.