Guðmundur Steingrímsson, formaður Bjartrar framtíðar, ætlar að tala fyrir því á næsta ársfundi að embætti innan flokksins verði látin „rótera á milli fólks“. Í þessu fælist að hann yrði sjálfur ekki áfram formaður, nema af og til, þegar röðin kæmi að honum.
Frá þessu greinir Guðmundur á Facebook-síðu sinni. „Staða Bjartrar framtíðar hefur verið mér og fleirum tilefni til mikilla og djúpra heilabrota um nokkurt skeið. Ég hef þá trú að í hverjum erfiðum kringumstæðum, hvort sem það er innan flokks, í þjóðfélagsmálunum eða hvar annars staðar, sé hægt finna leið sem einkennist af kærleika,“ skrifar hann og bætir því við að þessi kraftur sé alltaf til staðar en erfitt geti verið að finna hann. Þá skrifar Guðmundur:
„Kærleikur er kraftur“
„Ég veit þetta kann að hljóma full hugljúft í eyrum einhverra, en ég meina þetta. Kærleikur er kraftur sem gerir aðstæður betri. Ég hef engan áhuga á að taka þátt í formannsslag. Átök um embætti og völd innan stjórnmálaflokka eru töluverð meinsemd, að mínu viti. Heilu stjórnmálahreyfingarnar, gæddar fögrum hugsjónum, standa lamaðar í kjölfar slíkra átaka. Fókusinn á brýn úrlausnarefni í þjóðfélaginu, á verkefnin sem ráðast þarf í, hverfur í skuggann.“
„Allt of mikill fókus á mikilvægi formanna og á persónulega eiginleika þeirra finnst mér vera önnur meinsemd“
Hann segir að Björt framtíð sé „ekki svona stjórnmálaflokkur“ og verði það vonandi aldrei. „Í Bjartri framtíð starfar stór hópur fólks sem vill af einlægni vinna að því að bæta samfélagið. Allt of mikill fókus á mikilvægi formanna og á persónulega eiginleika þeirra finnst mér vera önnur meinsemd, til þess fallin að draga athygli frá því hversu mikið af fólki, góðu fólki, kemur í raun veru að því að gera flokk góðan og mikilvægan. Það gildir um Bjarta framtíð.“
Þjónandi forysta
Þá bendir Guðmundur á að í lögum Bjartrar framtíðar er öll áhersla lögð á öfugan píramída og þátttöku í stjórnmálum á grunni hugsjóna um þjónandi forystu. „Að taka þátt í stjórnmálum á vettvangi Bjartrar framtíðar er verkefni sem við förum í saman. Átökin skulum við eiga við andstæðinga okkar í pólitík. Hagsmunaklíkurnar, einangrunarsinnana, fordómaöflin og freka karlinn,“ skrifar Guðmundur og kynnir svo hugmynd sína:
„Sú tillaga, sprottin úr góðri umræðu innan flokksins, sem ég vil tala fyrir og afla brautargengis á Ársfundi BF, af hug og hjarta – vegna þess að ég hef trú á því að þetta sé rétta leiðin og í bestu samræmi við gildi Bjartrar framtíðar -- er þessi: Látum embættin innan flokksins, formennsku, stjórnarformennsku og þingflokksformennsku rótera á milli fólks. Tökum jafnari ábyrgð. Setjum fókusinn á málefnin, gildin, stefnuna. Hugsjónirnar. Berjumst fyrir þeim, en minna við hvort annað. Í þessu felst að ég sjálfur yrði ekki lengur formaður, nema þegar röðin kæmi að mér að axla þá ábyrgð til jafns við aðra.“
Gagnrýndi formanninn
Heiða Kristín Helgadóttir, einn af stofnendum Bjartrar framtíðar, lýsti efasemdum um það í samtali við Kjarnann í síðustu viku að Björt framtíð væri á réttri leið. Ítrekaði hún þetta í viðtali við Vikulokin á Rás 1 um helgina og sagðist telja að vandi Bjartrar framtíðar lægi að hluta til hjá formanninum. Hún er reiðubúin til að taka við formennskunni sjálf ef þess er óskað.
Guðmundur segir í stöðuuppfærslu sinni að það sé hugur í sér og hann vilji gangi í öll þau störf sem flokksmenn kunna að fela honum. „Það á enginn að starfa í Bjartri framtíð með því skilyrði að hann sé formaður, eins og það sé aðalatriðið. Það gildir um mig, og aðra. BF er ekki hefðbundinn stjórnmálaflokkur. Við föllum ekki í hefðbundnar gryfjur. Við erum lausnamiðað afl sem gengur til brýnna verka í þessu samfélagi með kærleika og gleði að vopni. Þannig vil ég stunda pólitík. Og þannig flokkur er Björt framtíð.“
Athugasemdir