Vigdís Hauksdóttir var harðorð í garð Ríkisútvarpsins í Facebook færslu fyrr í dag, þar sem hún deildi frétt RÚV um óánægju stjórnarandstöðunnar með stefnuleysi í þingstörfum. Þar deildi hún frétt RÚV um gagnrýni stjórnarandstöðunnar á ríkisstjórnina og sagði að „gula pressan“ séði um sína. „Nefskatturinn okkar sem eru eldri en 18 ára fer í þessa geðveiki sem RÚV er,“ bætti hún við og bað í kjölfarið skattgreiðendur afsökunar.  

„Gula pressan“ sem Vigdís talar um er oft notuð til þess að lýsa óvönduðum vinnubrögðum fréttafólks, en hún lýsir því þó ekki nánar hvað í umfjöllun RÚV gæti verið óvandað. Fréttin sem hún hlekkjar í fjallar um ummæli stjórnarandstöðunnar og samskiptum hennar við forseta þingsins. Vigdís bætti svo heldur í þegar hún sagði nefskattinn fara í þá „geðveiki sem RÚV er - !!!“ 

„Ég er náttúrlega í þessum hagræðingarhópi og þar liggur allt undir.“

Þetta er ekki í fyrsta skiptið sem formaður fjárlaganefndar hefur gagnrýnt fréttaflutning Ríkisútvarpsins, en stuttu eftir að hún tók við formanns embættinu lýsti hún því yfir að stofnunin væri of „evrópusinnuð“ og gaf til kynna að hún gæti skorið niður framlög vegna óánægju sinnar með efnistök þeirra:

„Er eðlilegt að ríkisstofnun eins og RÚV, sem tekur til sín 4 milljarða á ári af skattfé auk auglýsingatekna í samkeppni við einkastöðvar fari fram með þessum hætti? Ég er náttúrlega í þessum hagræðingarhópi og þar liggur allt undir. Mér finnst óeðlilega mikið fjármagn fara í rekstur RÚV. Sérstaklega þegar þeir eru ekki að standa sig betur í fréttaflutningi. Þeir eru hlynntir ákveðinni stefnu og hallast til vinstri. Þetta sjá allir sem vilja sjá. Ég fullyrði það og get staðið við hvar og hvenær sem er að stofnunin er mjög Evrópusambandssinnuð.“