Nokkrir keppendur í Grillsumrinu mikla, keppni á vegum fyrirtækisins Innnes, vekja athygli á því á Facebook-síðum sínum að svo virðist sem tvö lið hafi svindlað í keppninni með því að kaupa sér læk (e. like). Umræddur leikur snýst um að mismunandi lið sýndu takta sína á grillinu með vörum frá Innnesi og það lið sem fékk flest læk átti að vinna utanlandsferð til Búdapest. Meðfram keppninni voru sýndir þættir á mbl.is þar sem keppendur grilluðu eftir getu. Þáttastjórnandi var Áslaug Arna Sigurbjörnsdóttur, fyrrverandi formaður Heimdallar og fyrrverandi blaðamaður á Morgunblaðinu.
Atkvæðagreiðslu er ekki enn lokið í leiknum en nú er liðið Soho Grillvinafélagið með langflest læk eða um sex þúsund læk. Liðið Gaman að grilla er í öðru sæti með fjögur þúsund læk. Bæði lið eru grunuð um að hafa svindlað í keppninni með erlendum lækum. Liðið Grillhausarnir er svo í þriðja sæti með um 1700 læk.
Stundin ræddi við Garðar Örn Arnarson, liðsmann Soho Grillvinafélagsins, sem fullyrðir að lið sitt hafi ekki eytt krónu í læk. Liðið hafi hins vegar nýtt sér svokallaðar læk fyrir læk síður (e. „Like for like“) þar sem aðilar skiptast á lækum.
Stundin ræddi enn fremur við liðsmenn úr öðrum liðum sem nýttu sér ekki þessar síður og telja þeir þessa hegðun vera svindl á keppninni þar sem þau hafi lagt mikla vinnu í að hala inn lækum á heiðarlegri máta. Þeim blöskrar viðbrögð Innnes vegna málsins. Talsmaður Innnes neitaði að tjá sig um málið utan þess að segja að málið sé enn í skoðun. Sú staðhæfing stemmir ekki við tölvupósta, sem Stundin hefur undir höndum, sem fyrirtækið sendi á öll lið keppninnar.
„Ekki drengileg keppni“
Stundin hefur undir höndum tölvupósta sem Innnes sendi á keppendur. Í fyrri tölvupósti sem var sendur á mánudagsmorgni lýsir fyrirtækið aðferð efstu liðanna sem óheiðarlegri. „Í ljósi atburða helgarinnar er varða atkvæðagreiðsluna sáum við okkur knúin til að senda þetta bréf. Í atkvæðasöfnun hefur borið á „undarlegum“ fjölda atkvæða á stuttum tíma. Það gefur okkur vísbendingar um að ekki hafi verið safnað atkvæðum á heiðarlegan hátt og mögulega átt sér stað kaup á atkvæðum. Ef svo reynist rétt, þá er það ekki drengileg keppni og veitir ekki sigur í Grillsumrinu Mikla. Þetta mál er í skoðun. Við hvetjum ykkur til að halda áfram að safna atkvæðum á heiðarlegan hátt!“ segir í fyrra tölvupósti til keppenda.
„Við viljum því hvetja öll liðin til að leita allra mögulegra leiða til atkvæðasöfnunnar.“
Algjör umpólun á sér í stað í afstöðu fyrirtækisins í seinni tölvupósti til keppenda sem sendur var síðastliðinn þriðjudag. Í þeim pósti eru liðin raun hvött til að nýta sér allar leiðir til að hala inn lækum: „Í framhaldi af tölvupósti okkar í gær þá er það ljóst að einhver lið hafa valið að fara óhefðbundnar leiðir í atkvæðasöfun. Þegar lagt var af stað með þetta verkefni áttum við engan veginn von á því að nokkur myndi fara í að safna atkvæðum í gegnum erlendar þar til gerðar læk söfnunarsíður. Þar af leiðandi voru engar reglur hvað þetta varðar og hörmum við það.
Síðust tveir dagar hafa farið í það að finna eins farsæla lausn og mögulegt er og hefur málið verið skoðað frá öllum hliðum og margir hafðir með í ráðum. Niðurstaðan er hins vegar sú að engar reglur hafa verið brotnar og við teljum okkur ekki geta sett nýjar reglur í miðri keppni.
Við viljum því hvetja öll liðin til að leita allra mögulegra leiða til atkvæðasöfnunnar og höldum því okkar striki að það lið sem er með flest atkvæði kl 14 á fimmtudag vinnur keppnina.“
„Ríkasti grillarinn“
Lárus Jón Björnsson, liðsmaður Grillhausanna, er einn þeirra sem vakið hefur athygli á óheiðarlegum aðferðum annarra liða. „Jæja þá er formlegri keppni Grillhausanna í Grillsumarið Mikla lokið. Markmið keppninnar var greinilega ekki að finna skemmtilegustu og áhugaverðustu grillarana. Þegar öllu var á botninn hvolft snerist þetta víst bara um það hvaða lið gat keypt sér flest like á netinu og unnið hana þannig.
Við tilkynntum það á sunnudeginum að önnur lið væru að sanka að sér atkvæðum á ansi grunsamlegan hátt. Á mánudeginum fengum við það svar frá Innnes ehf. að þetta væri ekki í lagi. Við héldum því áfram á fullu að safna atkvæðum á heiðarlegan og „eðlilegan“ hátt en svo skiptu þeir allt í einu um skoðun í dag. Allar aðferðir leyfðar! Niðurstaðan er því sú að þeir sem eiga mestan pening komast til Búdapest. Gaman að því.
Ég vil allaveganna þakka öllum sem kusu okkur og dreifðu boðskapnum. Næsta sumar ætla þeir víst að hafa þetta aðeins opnara og halda keppnina „Ríkasti grillarinn“ og hvet ég alla til fylgjast vel með því. Það verður örugglega svaka stuð,“ skrifar Lárus á Facebook-síðu sína í gær.
„Þetta eru algjör vonbrigði.“
Í samtali við Stundina harmar Lárus ákvörðun Innnes að taka ekki á þessari óheiðarlegu atkvæðasöfnun. Hann segir lið sitt hafa lagt mikið á sig til að smala lækum á heiðarlegan máta. „Þetta eru algjör vonbrigði. Við erum búin að vera að peppa þetta í allt sumar, leggja þvílíka vinnu í þetta. Við ætluðum að komast til Búdapest á heiðarlegan og eðlilegan hátt eins og svona keppnir ganga fyrir sig vanalega,“ segir Lárus.
Mörg þúsund læk á stuttum tíma
Keppandi í öðru liði, Svakanaggar, Siggeir F. Ævarsson, tók skjáskot þar sem rússneskur aðili sem nefnist Viktor Krasnoperov eða Виктор Красноперов lækar Soho Grillvinafélagið. Við leit að þeim manni kemur í ljós að hann hefur engin augljós tengsl við Ísland og heldur enn fremur úti svokölluðu fjölþrepa markaðskerfi (e. Multi-Level Marketing).
Stundin ræddi við Siggeir sem segir það mikil vonbrigði að lið í keppninni fái að komast upp með svindl. Að hans sögn hafi Innnes ákveðið að aðhafast ekkert í málinu þar sem engar reglur hafi verið settar fyrir keppnina. „Á sunnudaginn varð ég var við að það var eitthvað mjög undarlegt í gangi og tók eftir því að þau höfðu að minnsta kosti tekið inn tvö þúsund atkvæði á tveimur klukkutímum. Ég var að vinna allan daginn í tölvunni og var að „refresh-a“ reglulega og ég sá töluna þjóta upp, þannig að það var svolítið grunsamlegt. Það voru tvö lið sem voru að fara undarlega hratt upp. Annað liðið, Gaman að grilla, fór upp úr 800 lækum í 3000 fyrir hádegi á sunnudegi. Þennan sama daga fór Soho Grillvinafélagið líka á stað,“ segir Siggeir.
Þurftu að bregðast við
Stundin náði tali af Garðari Erni Arnarsyni, liðsmanni Soho Grillvinafélagsins, og er á því máli að lið sitt hafi ekki svindlað í keppninni. „Við höfum ekki eytt krónu í þetta. Við höfum ekki keypt nein læk. Það er fullt af svona „like for like“ síður á Facebook sem eru með hundruð þúsund notendur þar sem fólk skiptist á lækum,“ segir Garðar.
„Fyrst þessi keppni ætlaði að vera svona þá fórum við að finna einhverja leið til að safna lækum.“
Garðar segir að lið sitt hafi einungis verið að bregðast við öðru liði sem hafi nýtt sér „like for like“ síður. „Við vorum efstir eftir einn dag og allt í einu skaust eitt lið upp í 3700 læk og þá vorum við í þúsund, svo við fórum bara og fundum einhverja leið. Fyrst þessi keppni ætlaði að vera svona þá fórum við að finna einhverja leið til að safna lækum,“ segir Garðar.
Athugasemdir