„Það er alveg ljóst að starfsemi sem er þegar mjög umfangsmikil og mjög viðkvæm á góðum degi verður fyrir miklum truflunum þegar svona lagað brestur á,“ segir Ólafur Baldursson, framkvæmdastjóri lækninga á Landspítala, í samtali við Stundina. Hann segir verkföll lífeindafræðinga, geislafræðinga og náttúrufræðinga hafa mjög mikil áhrif á starfsemi spítalans en þessar stéttir lögðu niður störf fyrir rúmri viku síðan. „Þarna er um að ræða mikilvægar stéttir í starfi spítalans og ljóst að bæði sjúklingar og aðstandendur munu verða fyrir truflunum af þessu,“ segir Ólafur, sem bindur vonir við að deiluaðilar muni brátt komast að samkomulagi.
Reglubundin starfsemi lömuð
Frestað hefur þurft um 60% myndgreiningarannsókna við Landspítala frá því verkföll hófust, um 50% blóðrannsókna og þá hefur um 200 skurðaðgerðum verið frestað. Samkvæmt upplýsingum frá Landspítala eru áhrifin á starfsemina mun meiri en voru af læknaverkfallinu í vetur, sem ræðst fyrst og síðast af því að nú er aldrei gert hlé á verkfallsaðgerðum. Stærsti hluti starfsemi Landspítalans er reglubundin starfsemi; skipulagðar aðgerðir, skipulagðar meðferðir og svo framvegis. Þessi starfsemi er nú lömuð. Allri bráðaþjónustu er hins vegar enn sinnt og mikilvægt að fólk veigri sér ekki við að leita hjálpar.
Athugasemdir