Sigurður Már Jónsson, upplýsingafulltrúi ríkisstjórnarinnar, taldi að mynd sem tekin var á flokksþingi Framsóknarflokksins árið 2011 hefði verið sett saman með hjálp tölvutækninnar og birt í því skyni að koma höggi á forsætisráðherra.
Taldi hann Vísi.is hafa notað umrædda mynd af Sigmundi Davíð til að styðja þá niðurstöðu Eiríks Bergmanns Einarssonar stjórnmálafræðings í nýlegri fræðigrein að Framsóknarflokkurinn sé orðinn þjóðernispopúlískur flokkur. Upplýsingafulltrúinn hefur nú beðist afsökunar á ásökunum sínum.
„Þetta er samsett mynd“
Þetta má sjá í umræðum á Facebook-síðu Jakobs Bjarnars Grétarssonar blaðamanns, en þar bregst upplýsingafulltrúinn af mikilli hörku við umfjöllun Jakobs á Vísi.is um rannsókn Eiríks Bergmanns.
„Myndin sem þú notar með af forsætisráðherra Jakob Bjarnar Gretarsson - er hún ekki örugglega samansett? Svona til að gefa fræðunum popúlarískari stimpil eða hvað!“ skrifar Sigurður Már sem var um skeið varaformaður Blaðamannafélags Íslands.
Þá fullyrðir hann í athugasemd nokkru síðar: „Þetta er samsett mynd sem enginn veit hver á eða bjó til og er einhverra hluta vegna í myndsafni Vísis. Hún er dregin fram þegar þarf að styðja tiltekin „vísindi“.“
Bendir Sigurður á að Eiríkur Bergmann hafi eitt sinn verið varaþingmaður Samfylkingarinnar. Svo virðist sem hann telji þetta draga úr trúverðugleika fræðigreinar Eiríks um þjóðernispopúlisma og Framsóknarflokkinn. Ekki er fjallað um Samfylkinguna í grein Eiríks.
Sigurði var bent á að myndin er ekki samsett, heldur tekin á flokksþingi Framsóknarflokksins fyrir fjórum árum þegar Sigmundur Davíð stillti sér upp fyrir framan mynd af Framsóknarmerkinu og slagorðinu „Ísland í vonanna birtu“. Í kjölfarið baðst Sigurður afsökunar og sagðist hafa haldið að myndin væri samsett vegna þess að hún er eignuð Icelandweatherreport.com. „Nú þegar virðist hafið yfir vafa að sá ágæti GVA hafi tekið hana biðst ég afsökunar. Dugar það?“ skrifar Sigurður. Með skammstöfuninni GVA vísar hann til Gunnars V. Andréssonar, virts blaðaljósmyndara.
Blaðamaður furðu lostinn
Stundin ræddi við Jakob Bjarnar, blaðamann á Vísi, um málið sem honum finnst athyglisvert í meira lagi. „Látum nú liggja á milli hluta glósurnar þar sem upplýsingafulltrúi ríkisstjórnarinnar vegur að fræðimannaheiðri Eiríks Bergmann. Lítum jafnvel hjá ávirðingunum á hendur mér og Vísi... að við séum að birta samsettar meintar áróðursmyndir, til hvers? Til að koma höggi á Sigmund Davíð?“ spyr hann og bætir við: „Hvers konar vænisýki er það?“
„Er hann þá ekki þar með að staðfesta og hnykkja á niðurstöðum þeim sem Eiríkur var að kynna í dag?“
Jakob segir að sér þyki athyglisvert að Sigurður Már hafi trúað því að mynd sem Gunnar V. Andrésson, reyndur og virtur ljósmyndari, tók á flokksþingi Framsóknarmanna árið 2011 væri samsett. „Er hann þá ekki þar með að staðfesta og hnykkja á niðurstöðum þeim sem Eiríkur var að kynna í dag? Mér finnst nú einhvern veginn að Sigurður Már mætti einbeita sér að því að sinna starfi sínu á þann veg að liðka til fyrir upplýsingum frá ríkisstjórninni til fjölmiðla og þar með almennings, fremur en vera á flögri eins og hrægammur á Facebook – til að passa uppá sinn mann með misgóðum árangri.“
Athugasemdir